കർണാടകയിൽ അടുത്ത അഞ്ച് ഞായറാഴ്ചകളിൽ സമ്പൂർണ ലോക് ഡൗൺ

ബെംഗളൂരു : കോവിഡ് കേസുകൾ ദിവസേന വർധിക്കുന്നതിൻ്റെ പശ്ചാത്തലത്തിൽ കർണാടകയിൽ വരുന്ന അഞ്ച് ഞായറാഴ്ചകളിൽ സമ്പൂർണ ലോക് ഡൗൺ ഏർപ്പെടുത്താൻ സംസ്ഥാന സർക്കാർ തീരുമാനിച്ചു. ജൂലൈ അഞ്ചു മുതൽ ഓഗസ്റ്റ് 2 വരെയുള്ള അഞ്ച് ഞായറാഴ്ചകളിലാണ് സമ്പൂർണ ലോക് ഡൗൺ നടപ്പിലാക്കുന്നത്.

കേന്ദ്രസർക്കാർ ജൂലൈ 31 വരെയുള്ള കാലയളവിലേക്കായി ഇറക്കിയ അൺലോക് 2 മാർഗനിർദ്ദേശങ്ങളുടെ ഭാഗമായി സംസ്ഥാന ചീഫ് സെക്രട്ടറി ടിഎം വിജയ ഭാസ്ക്കർ ഇറക്കിയ ഉത്തരവിലാണ് ഈ നിർദ്ദേശങ്ങൾ. നേരത്തെ നിശ്ചയിച്ച, മാറ്റിവെക്കാൻ സാധിക്കാത്ത വിവാഹങ്ങൾ മറ്റു പരിപാടികൾ എന്നിവ നടത്തുന്നതിന് തടസ്സമുണ്ടാകില്ലെന്നാണ് സർക്കുലറിൽ പറയുന്നത്.  രാത്രി എട്ടു മുതൽ അഞ്ചു മണി വരെ കർഫ്യൂ കർശനമാക്കിയിട്ടുണ്ട്. അവശ്യ സർവീസുകൾ, ഷിഫ്റ്റിൽ ജോലി ചെയ്യുന്നവർ, ബസ്, ട്രെയിൻ എന്നിവയിൽ നഗരത്തിലെത്തി വീട്ടിലേക്ക് പോകുന്നവർ എന്നിവരെ കർഫ്യൂവിൽ നിന്ന് ഒഴിവാക്കിയിട്ടുണ്ട്. ജൂലൈ പത്തുമുതൽ ആഗസ്റ്റ് രണ്ടാം ആഴ്ച വരെ അവശ്യമേഖലകൾ ഒഴിച്ചുള്ള എല്ലാ സർക്കാർ ഓഫീസുകളും എല്ലാ ശനിയാഴ്ചകളിലും അടച്ചിടുന്നതാണ്. കേന്ദ്ര സർക്കാർ നിർദ്ദേശപ്രകാരം സംസ്ഥാനത്തെ സ്കൂളുകൾ, കോളേജുകൾ, കോച്ചിങ്ങ് സെൻററുകൾ എന്നിവ അടച്ചിടുന്നതാണ്. രാജ്യാന്തര വിമാന സർവീസുകൾ, മെട്രോ റെയിൽ, ജിംനേഷ്യം, സിനിമാ ഹാളുകൾ, വിനോദ പാർക്കുകൾ, അക്കാദമിക് – സാംസ്കാരിക പരിപാടികൾ എന്നിവക്കുള്ള വിലക്ക് തുടരും.വിവാഹം ഉൾപ്പെടെയുള്ള ചടങ്ങുകൾക്ക് 50 ൽ കൂടുതൽ പേർ പങ്കെടുക്കരുത്. കണ്ടെയിൻമെൻ്റ് സോണുകളിൽ വിലക്കുകൾ പൂർണ്ണമായി പാലിക്കണം. നിരോധനം ലംഘിച്ച് പുറത്തിറങ്ങുന്നവർക്കെതിരെ കർശനമായ നടപടികൾ കൈകൊള്ളുമെന്ന് ഉത്തരവിൽ പറയുന്നു.