ഇസ്രായേൽ – ഹമാസ് സംഘർഷം: നിലവിലെ ചലനങ്ങളും ഭാവിയിലെ പ്രത്യാഘാതങ്ങളും
◼️ ജോമോന്‍ സ്റ്റീഫന്‍
പലസ്തീൻ തീവ്രവാദി ഗ്രൂപ്പായ ഹമാസിന്റെ അപ്രതീക്ഷിതമായ ഇസ്രായേൽ ആക്രമണവും ഇസ്രായേലിന്റെ പ്രത്യാക്രമണവും പശ്ചിമേഷ്യയെ വീണ്ടും യുദ്ധഭൂമിയാക്കി മാറ്റിയിരിക്കുകയാണ്. ചരിത്രപരവും ഭൗമരാഷ്ട്രീയവുമായ സങ്കീർണ്ണതകളിൽ വേരൂന്നിയ ഇസ്രായേൽ-ഹമാസ് സംഘർഷം, മധ്യപൂർവദേശത്തിന്റെ ചരിത്രം,രാഷ്ട്രീയ – സാമൂഹിക ഘടകങ്ങൾ, സാമ്പത്തിക സന്തുലിതാവസ്ഥ , ഭൂപ്രകൃതി എന്നിവയിൽ സ്വാധിനം ചെലുത്തുത്തുന്നതും രൂപപ്പെടുത്തുന്നതും തുടരുന്നു.
അക്രമത്തിന്റെയും വെടിനിർത്തലിന്റെയും നിരന്തരവും അവർത്തിക്കപ്പെടുന്നതുമായ ചക്രങ്ങളാൽ അടയാളപ്പെടുത്തപ്പെട്ട ഈ ഭൂപ്രദേശം, ആഴത്തിൽ വേരുറച്ചതും നിരന്തരം തുടരുന്നതുമായ സംഘർഷവും കൊണ്ട് ലോകത്തിന്റെ ശ്രദ്ധയിൽ നിറഞ്ഞുനിൽക്കുന്നു.
വംശീയവും ഭൗമരാഷ്ട്രീയവുമായ നിലവിലെ ചലനങ്ങൾ, കൃത്യതയോടെ മനസ്സിലാക്കാനും ഭാവിയിലെ പ്രത്യാഘാതങ്ങൾ മുൻകൂട്ടി അറിയാനും സൂക്ഷ്മമായ പഠനവും വിശകലനവും ആവശ്യപ്പെടുന്നുണ്ട്.
ഇസ്രായേൽ മണ്ണിലേക്ക് പൊടുന്നനെ കടന്നുകയറിയുള്ള ഹമാസിന്റെ ആക്രമണത്തിന് പിന്നിൽ മൂന്നു പ്രധാന കാരണങ്ങളുണ്ടെന്നാണ് അൽ ജസീറ ഉൾപ്പെടെയുള്ള അന്താരാഷ്ട്ര മാദ്ധ്യമങ്ങൾ ചൂണ്ടിക്കാണിക്കുന്നത്.
വെസ്റ്റ് ബാങ്കിൽ ഇരു കൂട്ടരും പുണ്യഭൂമി എന്ന് അവകാശപ്പെടുന്ന, ഈസ്റ്റ് ജറുസലേമിലെ അൽ അഖ്സ മുസ്ലീം പള്ളിയുടെ പേരിൽ വർഷങ്ങളായി തുടരുന്ന തർക്കമാണ് സമീപകാലത്ത് ഇവിടെയുണ്ടാകുന്ന ഏറ്റവും വലിയ സംഘർഷത്തിലേക്ക് എത്തിച്ചേർന്ന ഒന്നാമത്തെ കാരണം.
രണ്ടാമത്തെ കാരണമായി ചൂണ്ടിക്കാട്ടുന്നത്, വെസ്റ്റ് ബാങ്കിൽ ഇസ്രായേൽ സൈന്യം നടത്തുന്ന ആക്രമണമാണ്. ഒരു വർഷത്തിനിടെ 250 ഓളം പലസ്തീൻകാർ ഇസ്രായേൽ ആക്രമണത്തിൽ കൊല്ലപ്പെട്ടുവെന്നാണ് ഹമാസ് വൃത്തങ്ങൾ പറയുന്നത്.
മൂന്നാമതായി, കൃഷിയിടങ്ങളിലേക്ക് വരുന്ന പലസ്തീൻ തൊഴിലാളികളെ, ഇസ്രേയേൽ പട്ടാളം അതിർത്തിയിൽ തടയുന്നത് ശക്തമാക്കി.
നിലവിൽ ഗാസ മുനമ്പും വെസ്റ്റ് ബാങ്കുമാണ് ഹമാസ് സ്വാധിന മേഖലകൾ. 1967ലെ ഇസ്രയേൽ – അറബ് യുദ്ധത്തിലെ വിജയത്തിന് ശേഷം ഇരു പ്രദേശങ്ങളും പാലസ്തീനിൽ നിന്ന് ഇസ്രയേൽ പിടിച്ചെടുത്തി രുന്നു. 2005 -ൽ ഗാസയിൽ നിന്ന് ഇസ്രയേൽ സൈന്യത്തെ പിൻവലിച്ചതിന് ശേഷം പലസ്തീനിലെ രാഷ്ട്രീയ കാര്യങ്ങളിലും ഹമാസ് ഇടപെട്ടുതുടങ്ങി. എന്നാൽ പലസ്തീൻ അറബ് വംശജർ താമസിക്കുന്ന വെസ്റ്റ് ബാങ്ക് ഇസ്രയേൽ നിയന്ത്രണത്തിലാണ്.
പശ്ചാത്തലവും ചരിത്രപരമായ സന്ദർഭവും
ഇസ്രായേൽ-ഹമാസ് സംഘർഷത്തിന്റെ വേരുകൾ 1948-ൽ ഇസ്രായേൽ രാഷ്ട്രം സ്ഥാപിക്കപ്പെട്ടതും തുടർന്ന് വിവിധ രാജ്യങ്ങളിൽനിന്നുള്ള ജൂതന്മാരുടെ പലസ്തീൻ ഭൂമിയിലേക്കുള്ള കുടിയേറ്റവും പലസ്തീനികളുടെ കുടിയൊഴിപ്പിക്കലിലും കണ്ടെത്താനാകും.
ഭൂപ്രദേശം, വിഭവങ്ങൾ, ദേശീയ സ്വത്വം എന്നിവയിൽ മത്സരിക്കുന്ന അവകാശവാദങ്ങൾ സ്വയം നിർണ്ണയാവകാശത്തിനായുള്ള ഒരു നീണ്ട പോരാട്ടത്തിന് ആക്കം കൂട്ടി. ജനിച്ച മണ്ണിൽ നിന്നുമുള്ള ആട്ടിപ്പായിക്കലും നീതി നിഷേധവും, അടിച്ചമർത്തലുകളും, ജനകീയ പ്രതിരോധങ്ങളിലേക്ക് കൊണ്ടെത്തിച്ചു. ആത്യന്തികമായി, ഈ കാരണങ്ങൾ, ഹമാസ് പോലുള്ള തീവ്ര ഗ്രൂപ്പുകളുടെ ഉദയത്തിലേക്ക് നയിച്ചു.
സംഘർഷങ്ങളിലെ ചലനാത്മകത
ഇരു കൂട്ടരുടെയും സംഘർഷം അക്രമത്തിന്റെ ആവർത്തിച്ചുള്ള ചംക്രമണങ്ങൾക്ക് സാക്ഷ്യം വഹിച്ചിട്ടുണ്ട്. വിവാദ ഭൂമിയുടെ വിനിയോഗം, മതപരവും വംശീയവുമായ തർക്കങ്ങൾ, രാഷ്ട്രീയ പ്രകോപനങ്ങൾ തുടങ്ങിയ സംഭവങ്ങൾ സംഘർഷങ്ങളിലേക്ക് പ്രേരിപ്പിക്കപ്പെടുന്നു. പലപ്പോഴും, വെടിനിർത്തലിനുള്ള അന്താരാഷ്ട്ര ആഹ്വാനങ്ങൾ താൽക്കാലിക ആശ്വാസം നൽകുന്നുണ്ടെങ്കിലും, മൂലകാരണങ്ങളെ അപൂർവ്വമായി മാത്രമേ അഭിസംബോധന ചെയ്യുന്നുള്ളൂ.
ഗാസ മുനമ്പിൽ തളച്ചിട്ടുള്ള ജീവിതം നയിക്കുന്ന സിവിലിയൻമാരുടെ, ആഘാതം കഠിനമാണ്. അടിസ്ഥാന സൗകര്യങ്ങളുടെ നാശം, സ്ഥാനചലനം, ജീവഹാനി എന്നിവ ആവർത്തിച്ചുള്ള സവിശേഷതകളായി മാറിയിരിക്കുന്നു. ഇത് അന്തർദേശീയ ആശങ്ക ജനിപ്പിക്കുന്ന വലിയൊരു മനുഷ്യാവകാശ പ്രശ്നമായി മാറുന്നു. സുസ്ഥിരമായ ഒരു പരിഹാരം കണ്ടെത്തേണ്ടതിന്റെ അടിയന്തിര ആവശ്യകതയെ ഊന്നിപ്പറയുന്നു.
പ്രാദേശികവും അന്തർദേശീയവുമായ ചലനങ്ങൾ
ഇസ്രയേലിന്റെയും ഗാസയുടെയും അതിർത്തികൾക്കപ്പുറവും സംഘർഷം അലയടിക്കുകയാണ്. അയൽ രാജ്യങ്ങൾ ഉൾപ്പെടുന്ന വിശാലമായ പ്രാദേശിക ചലനാത്മകതയുമായി ഇത് ബന്ധപെട്ടു കിടക്കുന്നു. ഏതുനിമിഷവും വികസിക്കപ്പെടാവുന്ന ഭൗമരാഷ്ട്രീയ താൽപ്പര്യങ്ങൾ. വൻശക്തികളും ബഹുമുഖ സംഘടനകളും ഉൾപ്പെടെയുള്ള അന്താരാഷ്ട്ര സമൂഹം നയതന്ത്ര ശ്രമങ്ങളിൽ ഏർപ്പെട്ടിരിക്കുന്നുണ്ടെങ്കിലും ശാശ്വതമായ ഒരു പരിഹാരത്തിന് മധ്യസ്ഥത വഹിക്കുന്നതിൽ കാര്യമായ വെല്ലുവിളികൾ നേരിടുകയാണ്.
ഭാവിയിലെ പ്രത്യാഘാതങ്ങൾ
ദുരന്തബാധിതരായ ജനങ്ങളുടെ അടിസ്ഥാന ആവശ്യങ്ങൾ നിറവേറ്റുന്നതിൽ നിരന്തരമായ സംഘർഷം വലിയ വെല്ലുവിളികൾ ഉയർത്തുന്നു. ഇൻഫ്രാസ്ട്രക്ചർ പുനർനിർമ്മിക്കുക, മാനസിക ആഘാതങ്ങൾ പരിഹരിക്കുക, അവശ്യ സേവനങ്ങളിലേക്കുള്ള പ്രവേശനം ഉറപ്പാക്കുക എന്നിവ സംഘർഷാനന്തര ഘട്ടത്തിൽ നിർണായകമാണ്. ദുരന്ത ഭൂമികയിൽ ഏറെ കഷ്ടത അനുഭവിക്കുന്നത് കുട്ടികളും സ്ത്രീകളുമാണ്. കുട്ടികളുടെ വിദ്യാഭ്യാസം, ആരോഗ്യ സംരക്ഷണം എന്നിവ വലിയ ചോദ്യ ചിഹ്നങ്ങളായി അവശേഷിക്കും.
ജിയോപൊളിറ്റിക്കൽ ഷിഫ്റ്റുകൾ
ഇസ്രായേല്‍ അധിനിവേശത്തിന് മുന്നില്‍ പിടിച്ച് നില്‍ക്കാന്‍ ശ്രമിക്കുന്ന പലസ്തീന്‍ ജനതയ്ക്ക് എക്കാലവും അറബ് രാഷ്ട്രങ്ങള്‍ പിന്തുണ നല്‍കിപ്പോരുന്നുണ്ട്.
ഇസ്രയേൽ-ഹമാസ് സംഘർഷത്തിന് പ്രാദേശിക ഭൗമരാഷ്ട്രീയത്തെ സ്വാധീനിക്കാൻ കഴിയും എന്നതിൽ തർക്കമില്ല. ഇസ്രയേൽ – അറബ് രാജ്യങ്ങൾ തമ്മിൽ നടന്ന യുദ്ധങ്ങളിൽ അത് നിഴലിച്ചിരുന്നു. സഖ്യങ്ങൾ ഇനിയും മാറിയേക്കാം, ഭൗമരാഷ്ട്രീയ പിഴവുകൾ ആഴത്തിൽ വരാം, ഇത് മിഡിൽ ഈസ്റ്റിനെ മാത്രമല്ല, അന്താരാഷ്ട്ര ബന്ധങ്ങളെയും ബാധി ച്ചേക്കും.
സമാധാനത്തിനുള്ള സാധ്യതകൾ
ശാശ്വതമായ സമാധാനത്തിലേക്കുള്ള പാത അവ്യക്തമാണ്, പക്ഷേ അസാധ്യവുമല്ല. പ്രദേശിക തർക്കങ്ങൾ, അഭയാർഥികളുടെ മടങ്ങിവരാനുള്ള അവകാശം, ജറുസലേമിന്റെ പദവി തുടങ്ങിയ കാതലായ പ്രശ്‌നങ്ങളെ അഭിസംബോധന ചെയ്യുന്നത് നിർണായകമാകും. അന്തർദേശീയ മധ്യസ്ഥ ശ്രമങ്ങൾ, പ്രസക്തമായ എല്ലാ പങ്കാളികളും ഉൾപ്പെടുന്നതും സ്ഥിരവും, ബഹുസ്വരതയുള്ളതുമായിരിക്കണം.
സംഘർഷാനന്തര വേളയിൽ,സാമൂഹിക സാമ്പത്തിക ഘടന വീണ്ടെടുക്കലിന് വലിയ പ്രാധാന്യമുണ്ട്. പലസ്തീൻ – ഇസ്രേയേൽ ഭൂമികയുടെ ശാരീരിക പുനർനിർമ്മാണം മാത്രമല്ല, സാമൂഹിക സാമ്പത്തിക അസമത്വങ്ങൾ പരിഹരിക്കലും ഉൾപ്പെടുന്നു. വിദ്യാഭ്യാസം, ആരോഗ്യ സംരക്ഷണം, സാമ്പത്തിക വികസനം എന്നിവയിൽ ശ്രദ്ധയൂന്നുന്നത്, സുസ്ഥിരതക്കും സമാധാനത്തിനും, സംഭാവന നൽകുകയും സംഘർഷം വർദ്ധിപ്പിക്കുന്ന ഘടകങ്ങളുടെ തീവ്രത കുറയ്ക്കുകയും ചെയ്യും.
ശാശ്വത പരിഹരിഹാരം സാധ്യമോ ..?
ഇസ്രായേൽ-ഹമാസ് സംഘർഷം, പരിഹരിക്കുക അത്ര എളുപ്പമുള്ള ഒരു കാര്യമല്ല . ഒരു നൂറ്റാണ്ടിലപ്പുറം, ആഴത്തിൽ വേരൂന്നിയിട്ടുള്ള ചരിത്രപരമായ കാരണങ്ങളും ബഹുമുഖ ചലനാത്മകതയും, പ്രധാന വെല്ലുവിളിയായി തുടരുന്നു.
അടിസ്ഥാന കാരണങ്ങളെ അഭിസംബോധന ചെയ്യുന്നതിനും അർത്ഥവത്തായ സംഭാഷണം സുഗമമാക്കുന്നതിനുമുള്ള തടസ്സങ്ങൾ ശാശ്വതവുമായ ഒരു പരിഹാരത്തിനായി പ്രവർത്തിക്കുന്ന ഐക്യരാഷ്ട്ര സഭയെയും മറ്റു പ്രധാന ലോക രാഷ്ട്രങ്ങളെയും നിരാശരാക്കുകയാണ്.
സംഘർഷത്തിന്റെ ഭാവിയിലെ പ്രത്യാഘാതങ്ങൾ എത്രത്തോളം കുറക്കുവാൻ കഴിയുമെന്നത്, അന്താരാഷ്ട്ര സമൂഹത്തിന്റെ കൂട്ടായ ഇച്ഛാശക്തിയെ ആശ്രയിച്ചിരിക്കും. പ്രതികൂല സാഹചര്യങ്ങൾ തുടരുമ്പോഴും, മാനുഷിക അന്തസ്സിനും, സഹവർത്തിത്വത്തിനും, വരും തലമുറകൾക്ക് സമാധാനത്തിന്റെ ദർശനത്തിനും മുൻഗണന നൽകുന്ന പരിവർത്തനാത്മകമായ മാറ്റത്തിന് ഇനിയും അവസരമുണ്ട്. അർത്ഥവത്തായ ചർച്ചകളും വിട്ടുവീഴ്ച മനോഭാവവും കൊണ്ട് മാത്രേമേ പലസ്തീൻ – ഇസ്രേയേൽ സംഘർഷം ശാശ്വതമായി പരിഹരിക്കാൻ സാധിക്കുകയുള്ളു.
◼️
ന്യൂസ് ബെംഗളൂരുവിന്റെ ന്യൂസ് ആപ്പ് ഇപ്പോള്‍ പ്ലേ സ്റ്റോറില്‍ ലഭ്യമാണ്. ഇതൊരു ഓഡിയോ അധിഷ്ഠിത ആപ്ലിക്കേഷനാണ്. അതായത് ആപ്പ് ഇന്‍സ്റ്റാള്‍ ചെയ്ത ശേഷം വാര്‍ത്തയുടെ ഒന്നിച്ചുള്ള ഓഡിയോ ബട്ടണ്‍ അമര്‍ത്തിയാല്‍ നമ്മുക്ക് വാര്‍ത്ത കേള്‍ക്കാനും സാധിക്കും. ഡൗണ്‍ലോഡ് ചെയ്യാനുള്ള ലിങ്ക് ⏩
വാർത്തകൾ നിങ്ങളുടെ മൊബൈലിൽ ലഭിക്കാൻ മൊബൈൽ അപ്ലിക്കേഷൻ ഡൗൺലോഡ് ചെയ്യൂ
ആപ്പ് ഡൗണ്‍ലോഡ് ചെയ്യുന്നതില്‍ സാങ്കേതിക ബുദ്ധിമുട്ട് നേരിടുന്നുവെങ്കില്‍ വിളിക്കുക : 888 4227 444
മലയാളം ഓഡിയോ ലഭിക്കുന്നതില്‍ തടസ്സമുണ്ടെങ്കില്‍ (ചില മൊബൈല്‍ ഡിവൈസുകളില്‍ മലയാളത്തിന് പകരം ഇംഗ്ലീഷ് മാത്രമേ ലഭിക്കുന്നുവെങ്കില്‍) താഴെ കൊടുത്തിരിക്കുന്ന ഗൂഗിളിന്റെ ഓഡിയോ എക്സ്റ്റന്‍ഷന്‍ കൂടി ഡൗണ്‍ലോഡ് ചെയ്ത് ഇന്‍സ്റ്റാള്‍ ചെയ്യേണ്ടതാണ്.👇
DOWNLOAD GOOGLE TEXT-TO-SPEECH
ശ്രദ്ധിക്കുക : താഴെ കൊടുക്കുന്ന അഭിപ്രായങ്ങള്‍ വായനക്കാരുടേതു മാത്രമാണ്. നിങ്ങളുടെ അഭിപ്രായങ്ങള്‍ മലയാളത്തിലോ ഇംഗ്ലീഷിലോ മാത്രം എഴുതുക. വാര്‍ത്തകളോട് പ്രതികരിക്കുന്നവര്‍ അശ്ലീലവും അസഭ്യവും ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. കേന്ദ്രസര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവക്ക് എതിരായുള്ള അധിക്ഷേപങ്ങള്‍ നടത്തുന്നത് ശിക്ഷാര്‍ഹമായ കുറ്റമാണ്.