ഫ്ലാറ്റിനു തീപിടിച്ച് നാല് വയസുകാരൻ വെന്തുമരിച്ചു

ബെംഗളൂരു: ബെംഗളൂരുവിൽ ഫ്ലാറ്റിനു തീപിടിച്ച് നാല് വയസുകാരൻ വെന്തുമരിച്ചു. സുൽത്താൻപാളയയിലെ ബഹുനില കെട്ടിടത്തിൻ്റെ അഞ്ചാം നിലയിലുള്ള ഫ്ലാറ്റിലാണ് തീപിടിച്ചത്. കെട്ടിടത്തിലെ സെക്യൂരിറ്റി ജീവനക്കാരനായ പുരൺ കണ്ടക്കിൻ്റെയും വീട്ടുജോലിക്കാരിയായ ലക്ഷ്മിയുടെയും മകൻ അനുപ് ആണ് മരിച്ചത്. തീപിടുത്തം ഉണ്ടായ സമയത്ത് മാതാപിതാക്കൾ ജോലിക്ക് പോയിരുന്നു. കുട്ടി ഉറങ്ങുകയായിരുന്നതിനാൽ തീപിടിച്ചത് അറിഞ്ഞില്ല.

കുടുംബത്തിന് താഴത്തെ നിലയിൽ ഒരു ചെറിയ മുറിയും അഞ്ചാം നിലയിൽ ഒരു താൽക്കാലിക മുറിയും നൽകിയിരുന്നു. ദമ്പതികൾ അനുപിനെ അഞ്ചാം നിലയിലെ മുറിയിൽ കിടത്തി വാതിൽ പുറത്തുനിന്ന് പൂട്ടുകയായിരുന്നു. ഞായറാഴ്ച വൈകിട്ട് 5.30ഓടെയാണ് തീപിടിത്തമുണ്ടായത്. ഷോർട്ട് സർക്യൂട്ട് ആണ് അപകടകാരണമെന്നാണ് പ്രാഥമിക നിഗമനം. മുറിയിലെ വസ്ത്രങ്ങൾ, കിടക്ക, പുതപ്പ്, വീട്ടുപകരണങ്ങൾ എന്നിവയടക്കം കത്തിനശിച്ചു.

അഞ്ചാം നിലയിൽ നിന്ന് പുക ഉയരുന്നത് കണ്ട് സമീപത്തുള്ളവരാണ് ഫയർ ഫോഴ്‌സിനെ വിവരമറിയിച്ചത്. പോലീസും ഫയർ ഫോഴ്‌സും ചേർന്ന് കുട്ടിയെ പുറത്തെത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു.

The post ഫ്ലാറ്റിനു തീപിടിച്ച് നാല് വയസുകാരൻ വെന്തുമരിച്ചു appeared first on News Bengaluru.