‘ദിവ്യഗർഭം’ വാഗ്ദാനം ചെയ്ത് യുവതിയെ പീഡിപ്പിച്ച യൂട്യൂബർ അറസ്റ്റിൽ

തിരുവനന്തപുരം: മലപ്പുറം കൊളത്തൂരിൽ സിദ്ധൻ ചമഞ്ഞ് പീഡനം നടത്തിയ യൂട്യൂബ് ചാനൽ ഉടമ പിടിയിൽ. ദിവ്യ ഗർഭം വാഗ്‌ദാനം ചെയ്ത് യുവതിയെ ബലാൽസംഗം ചെയ്യുകയായിരുന്നു. മലപ്പുറം ഉദിരം പൊയിൽ സ്വദേശി സജിൽ ചെറുപാണക്കാടിനെയാണ് തിരുവനന്തപുരം നെടുമങ്ങാട് നിന്നും കൊളത്തൂർ പോലീസ് അറസ്റ്റ് ചെയ്തത്. ‘മിറാക്കിൾ പാത്ത്’ എന്ന യൂട്യൂബ് ചാനലിന്‍റെ ഉടമയാണ് പ്രതി.

കൽപകഞ്ചേരി പോലീസ് രജിസ്റ്റർ ചെയ്ത മറ്റൊരു പീഡനക്കേസിലും ഇയാൾ പ്രതിയാണ്. ഈ കേസിലെ പരാതിക്കാരിയായ യുവതിയുടെ ബന്ധുവിനെയാണ് സൗഹൃദം സ്ഥാപിച്ച് പിന്നീട് പീഡിപ്പിച്ചത്. ദിവ്യഗര്‍ഭം ഉണ്ടാക്കിത്തരാമെന്ന് വാഗ്ദാനം ചെയ്ത് ആഭിചാരക്രിയ ചെയ്യാനെന്ന വ്യാജേന യുവതിയുടെ വാടക വീട്ടിലെത്തിയ പ്രതി അതിക്രമിച്ച് കയറി യുവതിയെ പീഡിപ്പിക്കുകയായിരുന്നു. പരാതി ഉയർന്നതോടെ നാടുവിടുകയായിരുന്നു. നെടുമങ്ങാട് ഒളിവിൽ കഴിയവെ അവിടെ എത്തിയാണ് പോലീസ് കസ്റ്റഡിലെടുത്തത്.

ആഭിചാരക്രിയ ചെയ്ത് തരാമെന്ന് പറഞ്ഞ് ഇയാൾ പലരിൽ നിന്നും പണം തട്ടിയെന്നും പീഡിപ്പിച്ചെന്നും നിരവധി പേർ പോലീസിനെ ഫോൺ വഴി അറിയിച്ചിട്ടുണ്ട്. ഇവരോട് സ്റ്റേഷനിൽ നേരിട്ടെത്തി പരാതി നൽകാൻ പോലീസ് ആവശ്യപ്പെട്ടു.
SUMMARY: YouTuber arrested for raping woman by promising ‘divine pregnancy’