ബെംഗളൂരു: വൃദ്ധദമ്പതികളെ വീട്ടിൽ കയറി മർദിച്ച മരുമകൾക്കെതിരെ കേസെടുത്തു. ബെംഗളൂരുവിൽ സ്വകാര്യ ആശുപത്രിയിലെ ഡോക്ടറായ പ്രിയദർശിനിക്കെതിരെയാണ് ഭർതൃപിതാവിന്റെ പരാതിയിൽ പോലീസ് കേസെടുത്തത്. വനിതാ ഡോക്ടറും ഇവരുടെ മക്കളും വൃദ്ധദമ്പതികളെ മർദിക്കുന്നതിന്റെ വീഡിയോ കഴിഞ്ഞദിവസം സാമൂഹിക മാധ്യമങ്ങളിൽ പ്രചരിച്ചിരുന്നു. ഇതിന്റെ അടിസ്ഥാനത്തിലാണ് നടപടി.
ഡോ. പ്രിയദർശിനിയും പേരക്കുട്ടികളും തന്നെയും ഭാര്യയെയും മകനെയും വീട്ടിൽ കയറി അസഭ്യം പറഞ്ഞെന്നും മർദിച്ചെന്നുമാണ് ഭർതൃപിതാവായ ജെ. നരസിംഹയ്യയുടെ പരാതി. അതേസമയം, ഭർത്താവിന്റെ വീട്ടുകാർ തന്നെ പ്രകോപിപ്പിച്ചതിനെ തുടർന്നാണ് സംഭവം നടന്നതെന്ന് ഡോ. പ്രിയദർശിനി പറഞ്ഞു. ഭർത്താവ് മക്കൾക്ക് നൽകേണ്ട സാമ്പത്തിക സഹായം നൽകാത്തതിനാലാണ് ഭർത്താവിന്റെ വീട്ടിൽപോയത്. ഇതിനിടെയാണ് പ്രകോപനമുണ്ടായതെന്നും തുടർന്ന് ക്ഷമ നശിച്ചാണ് താനും കുട്ടികളും പ്രതികരിച്ചതെന്നും പ്രിയദർശിനി പറഞ്ഞു. സംഭവത്തിൽ ഇരുവിഭാഗങ്ങളുടെയും മൊഴികൾ പരിശോധിച്ചുവരികയാണെന്നും അന്വേഷണം പുരോഗമിക്കുകയാണെന്നും പോലീസ് പറഞ്ഞു.
TAGS: BENGALURU
SUMMARY: Doctor daughter in law attacks senior couples