ബെംഗളൂരു: ലൈംഗികാതിക്രമ കേസിൽ പ്രജ്വൽ രേവണ്ണ എത്രയും വേഗം ഇന്ത്യയിൽ തിരിച്ചെത്തി അന്വേഷണം നേരിടണമെന്ന് സംസ്ഥാന ബിജെപി അധ്യക്ഷൻ ബി. വൈ. വിജയേന്ദ്ര. ഇതിനോടകം പ്രജ്വലിനെ ജെഡിഎസ് സസ്പെൻഡ് ചെയ്തിട്ടുണ്ട്. ഇക്കാരണത്താൽ തന്നെ പ്രജ്വലിനെതിരായ അന്വേഷണവുമായി ബന്ധപ്പെട്ട് ജെഡിഎസിനെ അതിക്ഷേപിക്കാൻ ശ്രമിക്കരുതെന്ന് അദ്ദേഹം പറഞ്ഞു.
പ്രജ്വൽ രേവണ്ണ തിരഞ്ഞെടുക്കപ്പെട്ട ജനപ്രതിനിധി ആയതിനാൽ ഇക്കാര്യത്തിൽ വ്യക്തമായ മറുപടി നൽകണം. എസ്ഐടി അന്വേഷണം നേരിടണം. ഇതാണ് എല്ലാവരുടെയും ആവശ്യവുമെന്നും വിജയേന്ദ്ര പറഞ്ഞു. പ്രജ്വൽ എസ്ഐടിക്ക് മുന്നിൽ ഹാജരാകാൻ സമ്മതിച്ചതിനാൽ ഇനി സത്യം കണ്ടെത്തേണ്ടതുണ്ടെന്ന് കർണാടക ആഭ്യന്തര മന്ത്രി ജി. പരമേശ്വര പറഞ്ഞു.
അതേസമയം, ചോദ്യം ചെയ്യലിനായി മെയ് 31 ന് പ്രത്യേക അന്വേഷണ സംഘത്തിന് (എസ്ഐടി) മുമ്പാകെ ഹാജരാകുമെന്ന് പ്രജ്വൽ രേവണ്ണ തിങ്കളാഴ്ച പറഞ്ഞിരുന്നു. മുൻകൂട്ടി ആസൂത്രണം ചെയ്തതായിരുന്നു യാത്രയെന്നും താൻ ജർമനിയിൽ എത്തിയ ശേഷമാണ് കേസ് രജിസ്റ്റർ ചെയ്യപ്പെട്ടതെന്നും രേവണ്ണ പറഞ്ഞു. താൻ രാഷ്ട്രീയത്തിൽ വളർന്നു കൊണ്ടിരിക്കുന്നതിനാൽ തനിക്കെതിരെ രാഷ്ട്രീയ ഗൂഢാലോചനയുണ്ടെന്നും അദ്ദേഹം ആരോപിച്ചു.
