ബെംഗളൂരു: കർണാടകയില് ഉപതിരഞ്ഞെടുപ്പ് നടന്ന ദാവണഗെരെ സൗത്ത്, ബാഗൽകോട്ട് മണ്ഡലങ്ങളിലെ ഉപതിരഞ്ഞെടുപ്പ് ഫലം ഉച്ചയോടെ അറിയാം. വോട്ടെണ്ണലിനുള്ള ക്രമീകരണങ്ങൾ തിരഞ്ഞെടുപ്പു കമ്മിഷൻ പൂർത്തിയാക്കി. ബാഗൽക്കോട്ടിൽ ഹോർട്ടികൾച്ചറൽ സയൻസസ് സർവകലാശാലയിലും ദാവനഗെരെയിൽ ഡിആർആർ സ്കൂളിലും നടക്കുന്ന വോട്ടെണ്ണൽ രാവിലെ 8 മണിയോടെ ആരംഭിക്കും. രണ്ടുമണ്ഡലങ്ങളിലും വോട്ടെണ്ണൽ കേന്ദ്രത്തിൽ 14 ടേബിളുകൾ വീതം സജ്ജീകരിച്ചിട്ടുണ്ട്.
ഇരു മണ്ഡലങ്ങളും കോൺഗ്രസിന്റെ സിറ്റിങ് സീറ്റുകളാണ്. കോൺഗ്രസ് മുതിർന്ന നേതാക്കളും മുൻ മന്ത്രിമാരുമായ ശാമന്നൂർ ശിവശങ്കരപ്പയും എച്ച്.വൈ.മേട്ടിയും മരിച്ചതിനെ തുടർന്നാണ് ദാവനഗെരെ സൗത്തിലും ബാഗൽക്കോട്ടിലും ഉപതിരഞ്ഞെടുപ്പിന് കളമൊരുങ്ങിയത്.
ബാഗൽക്കോട്ടിൽ അന്തരിച്ച എം.എൽ.എ. എച്ച്.വൈ. മേട്ടിയുടെ മകൻ ഉമേഷ് മേട്ടിയാണ് കോണ്ഗ്രസ് സ്ഥാനാർഥി. ബിജെപിയുടെ വീരണ്ണ ചരന്തിമഠും ദാവനഗെരെ സൗത്തിൽ കോൺഗ്രസിന്റെ സമർഥ് മല്ലികാർജുനും ബിജെപിയുടെ ശ്രീനിവാസ് ടി.ദാസ കരിയപ്പയുമാണ് പ്രധാന സ്ഥാനാർഥികൾ. കേരളത്തിലെ തിരഞ്ഞെടുപ്പിനൊപ്പം ഏപ്രിൽ ഒൻപതിനാണ് ബാഗൽകോട്ടും ദാവണഗെരെ സൗത്തിലും ഉപതിരഞ്ഞെടുപ്പു നടന്നത്.
SUMMARY: Davanagere South, Bagalkot by-election results to be declared by noon
