കര്‍ഷക പ്രക്ഷോഭത്തില്‍ എഴുത്തുകാരും കലാകാരന്‍മാരും അണിനിരക്കണം – സിപിഎസി

ബെംഗളൂരു : രാജ്യവ്യാപകമായി നടക്കുന്ന കര്‍ഷക പ്രക്ഷോഭങ്ങളില്‍ എഴുത്തുകാരും കലാകാരന്‍മാരും ഉള്‍പ്പെടുന്ന എല്ലാ സാംസ്‌കാരിക പ്രവര്‍ത്തകരും പങ്കുചേരണമെന്ന് കര്‍ണാടക പ്രോഗ്രസീവ് ആര്‍ട്‌സ് ക്ലബ് പ്രസിഡണ്ട് സി പി കുഞ്ഞപ്പന്‍ ആവശ്യപ്പെട്ടു. ഭരണകൂട മുതലാളിത്ത ചങ്ങാത്തം ഇപ്പോള്‍ പരിപൂര്‍ണ്ണമായും മറനീക്കി വന്നിരിക്കുകയാണ്. കോര്‍പ്പറേറ്റുകള്‍ക്ക് ഇന്ത്യയിലെ മഹാഭൂരിപക്ഷം വരുന്ന കൃഷിക്കാരെ അടിമകളാക്കാനുള്ള സുവര്‍ണ്ണാവസരമാണ് കേന്ദ്ര സര്‍ക്കാര്‍ തുറന്ന് കൊടുത്തിരിക്കുന്നത്. രാജ്യസഭയില്‍ വോട്ടിംഗ് ആവശ്യപ്പെട്ട അംഗങ്ങളെ അടക്കം പുറത്താക്കിക്കൊണ്ട് പാര്‍ലമെന്ററി ജനാധിപത്യത്തിന്റെ കടക്കല്‍ കത്തി വെച്ചിരിക്കുകയാണ്. ത്യാഗപൂര്‍ണമായ സമരങ്ങളിലൂടെ തൊഴിലാളികള്‍ നേടിയെടുത്ത അവകാശങ്ങള്‍ പൂര്‍ണ്ണമായും റദ്ദു ചെയ്ത നടപടിയാണ് ബിജെപി സര്‍ക്കാറിന്റേത്. കര്‍ഷക സ്വാതന്ത്ര്യത്തിനായുള്ള അവകാശ പോരാട്ടത്തെ അര്‍ധസൈനിക വിഭാഗത്തെ ഉപയോഗിച്ചാണ് കേന്ദ്ര സര്‍ക്കാര്‍ നേരിടുന്നത്. ഇത്തരം ജനവിരുദ്ധ നയങ്ങള്‍ക്കെതിരായുള്ള പോരാട്ടത്തില്‍ എഴുത്തുകാരും കലാകാരന്‍മാരും രംഗത്ത് വരണമെന്ന് അദ്ദേഹം അഭ്യര്‍ത്ഥിച്ചു.