ബെംഗളൂരു: ചിക്കമഗളൂരുവിൽ മൂന്ന് വർഷത്തിനുള്ളിൽ കൂറ്റൻ ടെക്സ്റ്റൈൽ പാർക്കുകൾ തുറക്കാൻ അനുമതി. ജില്ലയിലെ ഹിരേഗൗജ, ചീലനഹള്ളി ഗ്രാമങ്ങളിലാണ് പാർക്കുകൾ തുറക്കുന്നത്. മലയാളികൾ ഉൾപ്പെടെ 8000 പേർക്ക് തൊഴിൽ സാധ്യതയാണ് ഇതോടെ ലഭ്യമാകുന്നത്
പൊതു – സ്വകാര്യ പങ്കാളിത്ത (പിപിപി) മാതൃകയിൽ രണ്ട് ടെക്സ്റ്റൈൽ പാർക്കുകൾ സ്ഥാപിക്കാൻ കർണാടക വാണിജ്യ – വ്യവസായ വകുപ്പ് (ടെക്സ്റ്റൈൽസ്) അംഗീകാരം നൽകി. ഹിരേഗൗജയിൽ (ചിക്കമഗളൂരു താലൂക്ക്) 15 ഏക്കർ സർക്കാർ ഭൂമിയും ചീലനഹള്ളിയിൽ (കടൂർ താലൂക്ക്) 25 ഏക്കർ സർക്കാർ ഭൂമിയും പദ്ധതിക്കായി അനുവദിച്ചു. പദ്ധതിയുമായി ബന്ധപ്പെട്ട് നടപടികൾ ആരംഭിക്കാൻ വ്യവസായ വകുപ്പ് സെക്രട്ടറി അധികൃതർക്ക് നിർദേശം നൽകി.
വൈകാതെ ടെക്സ്റ്റൈൽ വകുപ്പ് പിപിപി മോഡിൽ പാർക്കുകൾ സ്ഥാപിക്കുന്നതിനുള്ള ടെൻഡർ നടപടികൾ ആരംഭിക്കും. വെള്ളം, വൈദ്യുതി സൗകര്യങ്ങൾ ഉൾപ്പെടെയുള്ളവ സർക്കാർ നൽകും. ഹിരേഗൗജ ദേശീയ പാതയോട് ചേർന്നുള്ള പ്രദേശമായതിനാൽ റെഡിമെയ്ഡ് ടെക്സ്റ്റൈൽ നിർമാണ സൗകര്യങ്ങളും വസ്ത്ര ഫാക്ടറികളും സ്ഥാപിക്കുന്നതിന് അനുയോജ്യമാണ്.
TAGS: KARNATAKA | TEXTILE PARK
SUMMARY: Textile parks to be opened at chikkamangaluru
