കടുവയുടെ ആക്രമണത്തിൽ കർഷകന് പരുക്ക്

ബെംഗളൂരു: കർണാടകയിൽ കടുവയുടെ ആക്രമണത്തിൽ കർഷകന് പരുക്ക്. ചാമരാജനഗര ഹൊനകനഹള്ളി ഗ്രാമത്തിലാണ് സംഭവം. കർഷകനായ മന്നുവിനാണ് (22) പരുക്കേറ്റത്. വെള്ളിയാഴ്ച വൈകിട്ട് 6.30 ഓടെയായിരുന്നു സംഭവം.

വയലിൽ നിന്നും വീട്ടിലേക്ക് മടങ്ങുകയായിരുന്ന മന്നുവിനെ പെട്ടെന്ന് കടുവ ആക്രമിക്കുകയായിരുന്നു. മന്നുവിന്റെ നിലവിളി കേട്ട് നാട്ടുകാർ ഓടിക്കൂടിയതോടെ കടുവ സ്ഥലത്ത് നിന്നും കാട്ടിലേക്ക് രക്ഷപ്പെട്ടു. മന്നുവിന് കഴുത്തിലും കൈകളിലും പരുക്കേറ്റു. ഇയാളെ മൈസൂരുവിലെ ആശുപത്രിയിൽ പ്രവേശിപ്പിച്ചു. പ്രദേശത്ത് കഴിഞ്ഞ കുറച്ച് ദിവസങ്ങളായി കടുവയുടെ ശല്യം രൂക്ഷമാണെന്ന് നാട്ടുകാർ ആരോപിച്ചു. കടുവയെ പിടികൂടാൻ കെണി വെച്ചതായി വനം വകുപ്പ് ഉദ്യോഗസ്ഥർ പറഞ്ഞു.

The post കടുവയുടെ ആക്രമണത്തിൽ കർഷകന് പരുക്ക് appeared first on News Bengaluru.