കഥകളി അരങ്ങേറ്റം 18 ന്

ബെംഗളൂരു : ബെംഗളൂരു ക്ലബ് ഫോർ കഥകളി ആൻഡ് ദി ആർട്‌സിന്റെയും (ബി.സി.കെ.എ.) കൈരളീ കലാ സമിതിയുടെയും ആഭിമുഖ്യത്തിൽ വിമാനപുര കൈരളീ നിലയം സ്കൂളിൽ കഥകളി പഠനകളരിയുടെ ആദ്യ ബാച്ച് വിദ്യാർഥികളുടെ അരങ്ങേറ്റം ശനിയാഴ്ച നടക്കും. 2023 മുതൽ നടന്നു വരുന്ന കഥകളി-കഥകളി വേഷ പഠന കളരിയിലെ ആദ്യ ബാച്ചിലെ 8 വിദ്യാർഥികളുടെ അരങ്ങേറ്റമാണ് നടക്കുന്നത്.

വൈകീട്ട് 5.30-ന് കൈരളീ നിലയം സ്കൂളിൽ നടക്കുന്ന ചടങ്ങിൽ പ്രശസ്ത നടിയും നർത്തകിയുമായ മഞ്ജു ഭാർഗവി മുഖ്യാതിഥിയായിരിക്കും. പ്രശസ്ത കഥകളി കലാകാരൻ കലാമണ്ഡലം സി. ഗോപാലകൃഷ്ണൻ ചടങ്ങിൽ വിശിഷ്ട അതിഥിയായിരിക്കും. കൈരളീ കലാസമിതി പ്രസിഡന്റ് സുധാകരൻ രാമന്തളി, ജനറൽ സെക്രട്ടറി പി.കെ. സുധീഷ്, ബി.സി.കെ.എ. പ്രസിഡന്റ് ലളിതാ ദാസ് തുടങ്ങിയവർ പങ്കെടുക്കും. അക്ഷോഭ് എസ്. പണിക്കർ, ശ്രീഹരി മനു, കാർത്തിക് ആർ. നായർ, നിവേദിത പണിക്കർ, വി. ഗീതിക, ടി.എസ്. അരുന്ധതി, ആകാശ് നരസിപുർ, സി. രതിനായർ എന്നീ വിദ്യാർഥികൾ പുറപ്പാട് വഴി അരങ്ങേറ്റം കുറിക്കും. തുടർന്ന് മുതിർന്ന വിദ്യാർഥികളായ ഡോ. ലീലാ രാമചന്ദ്രൻ, അച്യുത് വാരിയർ, മീരാ മനോജ്, ഗൗരി പാർവതി പാലശ്ശേരി എന്നിവർ ദുര്യോധനവധം, സന്താനഗോപാലം, ലവണാസുരവധം എന്നീ കഥകളിലെ തിരഞ്ഞെടുത്ത രംഗങ്ങൾ അവതരിപ്പിക്കും.

കഥകളി വേഷ വിഭാഗത്തിൽ വനിതാ സാന്നിധ്യത്തിലെ പ്രശസ്ത കഥകളി കലാകാരിയും ബെംഗളൂരു നിവാസിയുമായ ‘കലാക്ഷേത്രം’ പ്രിയാ നമ്പൂതിരിയാണ് ക്ലാസുകൾ നയിക്കുന്നത്. മൂന്ന് പതിറ്റാണ്ടിലേറെയായി കഥകളി അവതരിപ്പിക്കുന്ന പ്രതിഭാധനയായ കലാകാരിയാണ് പ്രിയ. മുംബൈയിൽ കഥകളിയെ ജനകീയമാക്കിയ കലാമണ്ഡലം സി. ഗോപാലകൃഷ്ണന്റെ ശിക്ഷണത്തിൽ 8 വയസ്സുള്ളപ്പോൾ പരിശീലനം ആരംഭിച്ച്‌, 1991-ൽ പ്രിയ തൻ്റെ അരങ്ങേറ്റം ചെയ്തു, കേരളത്തിലും മുംബൈയിലും തൻ്റെ ഗുരുവിനോടൊപ്പവും കലാമണ്ഡലം രാമൻകുട്ടി നായർ, കലാമണ്ഡലം ഗോപി, കോട്ടക്കൽ ശിവരാമൻ തുടങ്ങി ഈ രംഗത്തെ പ്രമുഖർക്കൊപ്പവും നിരവധി അരങ്ങുകളിൽ അവർ കഥകളി അവതരിപ്പിച്ചിട്ടുണ്ട്.

പച്ച, കത്തി, താടി, മിനുക്ക് എന്നിവയുൾപ്പെടെ വൈവിധ്യമാർന്ന വേഷങ്ങൾ അവതരിപ്പിച്ച് പ്രിയ തൻ്റെ കഴിവ് തെളിയിച്ചു, കഥകളിയിലെ ഏറ്റവും ശാരീരിക വെല്ലുവിളി നിറഞ്ഞ കഥാപാത്രങ്ങളായ ഉൽഭവത്തിലെ രാവണൻ, നരകാസുരവധത്തിലെ നരകാസുരൻ, സീതാസ്വയംവരത്തിലെ പരശുരാമൻ തുടങ്ങിയ കഥാപാത്രങ്ങളെ തന്മയത്വത്തോടെ അവതരിപ്പിക്കാൻ പ്രിയയ്ക്ക് സാധിച്ചിട്ടുണ്ട്. കഥകളിയിലെ ഏറ്റവും സങ്കീർണ്ണമായ വേഷങ്ങളിലൊന്നായ കിർമീരവധത്തിലെ ധർമ്മപുത്രരെ അവതരിപ്പിച്ച ആദ്യ വനിതാ കലാകാരികൂടിയാണ് പ്രിയ.

ദൂരദർശനിലെ ഗ്രേഡഡ് ആർട്ടിസ്റ്റായ പ്രിയ 2017-18 വർഷത്തെ സാംസ്കാരിക മന്ത്രാലയത്തിന് കീഴിലുള്ള ജൂനിയർ ഫെലോഷിപ്പിന് അർഹയാണ്. തൃപ്പൂണിത്തുറ കഥകളി ക്ലബ്ബിൻ്റെ കെ.കെ.രാജ സ്മാരക ചൊല്ലിയാട്ടം സമ്മാനം, ബോംബെ യോഗക്ഷേമ സഭയുടെ മികച്ച നേട്ടത്തിനുള്ള അവാർഡ്, ചാലക്കുടി കഥകളി ക്ലബ്ബിൻ്റെ സുവർണ മുദ്ര, മുംബൈയിലെ കേളിയിൽ നിന്നുള്ള രജത ശംഖു അവാർഡ് എന്നിവ പ്രിയയുടെ ശ്രദ്ധേയമായ അംഗീകാരങ്ങളിൽ ചിലതാണ്. കേരളത്തിലെ ഒട്ടനവധി കഥകളി ക്ലബ്ബുകളിലെയും ക്ഷേത്രങ്ങളിലെയും കഥകളി അരങ്ങുകളിൽ സ്ഥിര സാന്നിധ്യമായ അവർ, കഥകളി ശില്പശാലകളും നടത്തുന്നുണ്ട്.
<BR>
TAGS :  KATHAKALI | ART AND CULTURE