ജഡ്ജിയുടെ കാര്‍ തടഞ്ഞ് ഡ്രൈവറെ ചീത്ത വിളിച്ച കോണ്‍ഗ്രസ് നേതാവ് അറസ്റ്റില്‍

ജഡ്ജിയുടെ കാർ തടഞ്ഞ് ഡ്രൈവറെ അസഭ്യം പറഞ്ഞ സംഭവത്തില്‍ കോണ്‍ഗ്രസ് നേതാവ് അറസ്റ്റില്‍. ആലപ്പുഴ നോർത്ത് ബ്ലോക്ക് പ്രസിഡന്റ് കെഎ സാബുവാണ് അറസ്റ്റിലായത്. മോട്ടോർ വെഹിക്കിള്‍ ക്ലെയിംസ് ട്രൈബ്യൂണല്‍ ജഡ്ജിയുടെ വാഹനമാണ് പ്രതി തടഞ്ഞത്.

ജഡ്ജിയെ വീട്ടില്‍ കൊണ്ടുവിട്ട ശേഷം തിരികെ വരികയായിരുന്നു ‍ഡ്രൈവർ. രണ്ട് ദിവസം മുമ്പ് പുന്നമടയില്‍ വച്ചാണ് സംഭവമുണ്ടായത്. സംഭവ സമയത്ത് ജഡ്‍ജി വാഹനത്തിനുള്ളില്‍ ഉണ്ടായിരുന്നില്ല. ഡ്രൈവറുടെ പരാതിയെ തുടർന്ന് പോലീസ് കേസെടുത്ത് അന്വേഷണം ആരംഭിച്ചിരുന്നു. തുടർന്നാണ് അറസ്റ്റ് രേഖപ്പെടുത്തിയത്.

ഗട്ടർ ഒഴിവാക്കാനായി ഡ്രൈവർ വാഹനം വലതുവശത്തേക്ക് എടുത്തു. ഈ സമയം എതിർദിശയില്‍ നിന്നും വന്ന സാബു തന്നെ ഇടിക്കാൻ വന്നുവെന്ന് ആരോപിച്ചാണ് പ്രശ്നമുണ്ടാക്കിയത്. തുടർന്ന് ഇയാള്‍ കാർ തടഞ്ഞു നിർത്തുകയും അസഭ്യം പറയുകയുമായിരുന്നു.