ബെംഗളൂരുവിൽ ആദായനികുതി വകുപ്പ് റെയ്ഡിൽ കോടികളുടെ സ്വർണവും വജ്രവും പണവും പിടിച്ചെടുത്തു

ബെംഗളുരു: ലോക്‌സഭാ തിരഞ്ഞെടുപ്പിന് മുന്നോടിയായി ബെംഗളൂരുവിലെ 16 സ്ഥലങ്ങളിൽ ആദായനികുതി വകുപ്പ് നടത്തിയ റെയ്ഡില്‍ കോടികളുടെ പണവും സ്വര്‍ണവും പിടിച്ചെടുത്തു. കഴിഞ്ഞ രണ്ട് ദിവസങ്ങളിലായി ഒരു കോടി 33 ലക്ഷം രൂപയുടെ കുഴല്‍പ്പണവും 22.923 കിലോ ഗ്രാം സ്വര്‍ണ്ണാഭരണങ്ങളും വജ്രങ്ങളും ബിനാമി സ്വത്ത് രേഖകളുമാണ് പിടിച്ചെടുത്തത്. വ്യവസായികളുടെയും സ്വര്‍ണ വ്യാപാരികളുടെയും സ്ഥലങ്ങളിലാണ് പരിശോധന നടത്തിയത്.

റെയ്ഡ് നടന്ന ഭൂരിഭാഗം പ്രദേശങ്ങളും ബെംഗളുരു സൗത്ത് ലോക്സഭാ മണ്ഡലത്തിന്റെ പരിധിയിലാണ്. മണ്ഡലത്തിലെ ശങ്കർപൂരിൽ നിന്നാണ് മൂന്ന് കോടിയിലധികം രൂപയുടെ സ്വർണാഭരണങ്ങൾ പിടികൂടിയത്. സാരാദേവി റോഡിൽ നിന്ന് 3 കോടി 39 ലക്ഷം രൂപയുടെ സ്വർണവും ജയനഗർ മൂന്നാം ബ്ലോക്കിൽ നിന്ന് 5 കോടി 33 ലക്ഷം രൂപയുടെ സ്വർണവും കണ്ടെടുത്തുവയില്‍പ്പെടുന്നു.

അതേസമയം, ഏപ്രിൽ 26ന് തെരഞ്ഞെടുപ്പ് നടക്കുന്ന കർണാടകയിലെ 14 ലോക്‌സഭാ സീറ്റുകളിലേക്കുള്ള പ്രചാരണം ബുധനാഴ്ച വൈകുന്നേരത്തോടെ അവസാനിച്ചു. സംസ്ഥാനത്ത് ആകെ 28 ലോക്‌സഭാ മണ്ഡലങ്ങളാണ് ഉള്ളത്. ബാക്കിയുള്ള 14 മണ്ഡലങ്ങളിൽ മെയ് 7 ന് വോട്ടെടുപ്പ് നടക്കും.