ബെംഗളൂരു – ആലപ്പുഴ റൂട്ടിൽ ബസ് സർവീസ് ആരംഭിച്ച് ഫ്ലിക്സ് ബസ്

ബെംഗളൂരു: ബെംഗളൂരു – ആലപ്പുഴ റൂട്ടിൽ ബസ് സർവീസ് ആരംഭിച്ച് ജർമനിയിലെ ഇന്റർസിറ്റി ബസ് സർവീസ് ദാതാക്കളായ ഫ്ലിക്സ് ബസ്. രാത്രി 8.35ന് ബെംഗളൂരുവിൽ നിന്ന് പുറപ്പെട്ട് പിറ്റേദിവസം രാവിലെ 10.50ന് ആലപ്പുഴയിലെത്തും. തിരിച്ച് ആലപ്പുഴയിൽനിന്ന് രാത്രി 7.30ന് പുറപ്പെട്ട് പിറ്റേദിവസം രാവിലെ 9.25ന് ബെംഗളൂരുവിലെത്തുന്ന രീതിയിലാണ് സർവീസ്.

കൃഷ്ണഗിരി, സേലം, ഈറോഡ്, തിരുപ്പൂർ, കോയമ്പത്തൂർ, പാലക്കാട്, തൃശ്ശൂർ, കൊച്ചി എന്നിവിടങ്ങളിൽ സ്റ്റോപ്പുണ്ട്. 1400 രൂപയാണ് നിരക്ക്. ബെംഗളൂരുവിന് പുറമെ ഗോവയിലേക്കും ഫ്ലിക്സ് ബസ് സർവീസ് ആരംഭിച്ചിട്ടുണ്ട്. രാജ്യത്തെ പ്രധാന ടൂറിസം കേന്ദ്രങ്ങളായ ഗോവയെയും കേരളത്തെയും ബെംഗളൂരുവുമായി ബന്ധിപ്പിക്കുന്ന ബസ് സർവീസുകൾ ആരംഭിക്കുന്നതിൽ സന്തോഷമുണ്ടെന്ന് ഫ്ലിക്സ്ബസ് ഇന്ത്യ എം.ഡി. സൂര്യ ഖുറാന പറഞ്ഞു.

സ്ഥിരംയാത്രക്കാരുള്ള പ്രത്യേക സീസണുകളും ആഘോഷദിവസങ്ങളും കൂടി കണക്കിലെടുത്താണ് രണ്ട് റൂട്ടുകളിലും ബസുകൾ ഇറക്കിയത്. കഴിഞ്ഞ സെപ്റ്റംബറിൽ ബെംഗളൂരുവിൽ നിന്ന് ചെന്നൈ, ഹൈദരാബാദ്, മധുര, കോയമ്പത്തൂർ എന്നിവിടങ്ങളിലേക്ക് സർവീസ് ആരംഭിച്ചിരുന്നു. ഭാവിയിൽ കേരളത്തിലുൾപ്പെടെ 33 നഗരങ്ങളിലേക്ക് സർവീസ് ആരംഭിക്കുമെന്ന് അദ്ദേഹം പറഞ്ഞു. പ്രാദേശിക ബസ് ഓപ്പറേറ്റർമാരുമായി സഹകരിച്ചാകും സർവീസ് നടത്തുക.

TAGS: BENGALURU | FLIXBUS
SUMMARY: Flixbus starts service from Bangalore to Allappey