വേദനയില്‍ പുളഞ്ഞ് ഒരു വയസുകാരി; ഫോളേവേഴ്സിനെ കൂട്ടാനായി ഇൻഫ്ലുവൻസര്‍ അമ്മയുടെ ക്രൂരത

സമൂഹമാധ്യമങ്ങളില്‍ നിന്ന് സംഭാവന പ്രതീക്ഷിച്ചും ഫോളോവേഴ്സിനെ കൂട്ടാനുമായി മകള്‍ക്ക് വിഷം നല്‍കിയ ഇൻഫ്ലുവൻസർ അറസ്റ്റില്‍. 34-കാരിയായ ഇൻസ്റ്റഗ്രാം ഇൻഫ്ളുവൻസർ ഫോളോവേഴ്സിനെ കൂട്ടാനും സാമ്പത്തിക ലാഭത്തിനുമായി സ്വന്തം കുഞ്ഞിന് വിഷം നല്‍കി. ഓസ്ട്രേലിയയിലെ ക്വീൻസ്ലാൻഡ് സ്വദേശിനിയെയാണ് പോലീസ് അറസ്റ്റ് ചെയ്തത്.

സംഭാവനയ്‌ക്ക് വേണ്ടി കുഞ്ഞ് വേദനയില്‍ പിടയുന്ന വീഡിയോയും ചിത്രങ്ങളും ഇവർ ഇൻസ്റ്റഗ്രാമില്‍ നിരന്തരമായി പങ്കുവച്ചിരുന്നു. 60000 ഡോളർ (ഏകദേശം 51 ലക്ഷം ഇന്ത്യൻ രൂപ) ഇവർ ഇത്തരത്തില്‍ നേടിയെന്നാണ് പോലീസ് പറയുന്നത്. നിരന്തരമായി മകളുടെ രോഗാവസ്ഥയക്കുറിച്ച്‌ യുവതി സമൂഹമാധ്യമങ്ങളില്‍ വീഡിയോ ചെയ്തിരുന്നു.

ഒരു വയസുകാരിയായ മകള്‍ക്ക് മരുന്നുകള്‍ നല്‍കിയ ശേഷം കടുത്ത വേദന അനുഭവിക്കുന്നതായുള്ള ദൃശ്യങ്ങള്‍ യുവതി ചിത്രീകരിച്ചതായാണ് അന്വേഷണ ഉദ്യോഗസ്ഥർ വിശദമാക്കുന്നത്. ഒക്ടോബറിലാണ് ഒരു വയസുകാരിയുടെ ആരോഗ്യ സ്ഥിതിയേക്കുറിച്ച്‌ ഡോക്ടർമാർ ആശങ്ക പ്രകടിപ്പിച്ചത്.

നിരന്തരമായി കുട്ടി ചികിത്സ തേടേണ്ടി വരുന്ന അവസ്ഥയായിരുന്നു. മാസങ്ങള്‍ നീണ്ട അന്വേഷണത്തിനൊടുവിലാണ് 34കാരിയായ യുവതി മകള്‍ക്കെതിരെ ചെയ്ത അക്രമ സംഭവങ്ങള്‍ പുറത്ത് വന്നത്. കുട്ടിയെ ദുരുപയോഗിച്ച്‌ സാമ്പത്തിക ലാഭമുണ്ടാക്കാൻ ശ്രമിച്ചതിനാണ് 34കാരി അറസ്റ്റിലായത്. കഴിഞ്ഞ ഓഗസ്റ്റ് ആറുമുതല്‍ ഓക്ടോബർ 15 വരെ ഒരുവയസുകാരി മകള്‍ക്ക് ഇവർ ഗുരുതരമായ മരുന്നുകള്‍ നല്‍കിയിരുന്നു.

ഡോക്ടർമാരുടെ നിർദേശമില്ലാതെയാണ് അനാവശ്യ മരുന്നുകള്‍ ഇവർ മകള്‍ക്ക് നല്‍കിയത്. ആശുപത്രിയിലെത്തിയപ്പോഴാണ് ഡോക്ടർമാർ കുഞ്ഞിന്റെ ആരോഗ്യത്തിലും അസുഖത്തിലും സംശയം പ്രകടിപ്പിച്ചതും വിവരം പോലീസിനെ അറിയിച്ചതും. ഗോ ഫണ്ട് മീ ഡൊണേഷൻ മുഖേനയാണ് ഇവർ പണം സ്വരുക്കൂട്ടിയത്. ഇവരെ വെള്ളിയാഴ്ച കോടതിയില്‍ ഹാജരാകും.

TAGS : CRIME
SUMMARY : Influencer mother’s brutality to gather followers