ബെംഗളൂരു: ഇത്തവണത്തെ വേനലിൽ സംസ്ഥാനത്ത് ജലക്ഷാമം രൂക്ഷമായേക്കും. ബെംഗളൂരു ഉൾപ്പെടെ സംസ്ഥാനത്ത് ഭൂഗർഭജല ചൂഷണം വർധിക്കുന്നതായി കർണാടക ഭൂഗർഭജല ഡയറക്ടറേറ്റ്. ബെംഗളൂരുവിലെ ഭൂഗർഭജലം വർഷങ്ങളായി അമിതമായി ചൂഷണം ചെയ്യപ്പെടുകയാണ്. ഇതുകൊണ്ട് തന്നെ മഹാദേവപുര, വൈറ്റ്ഫീൽഡ് തുടങ്ങിയ പ്രദേശങ്ങളിലെ ഭൂഗർഭജലനിരപ്പ് ഗണ്യമായി കുറഞ്ഞേക്കുമെന്ന് ഭൂഗർഭജല ഡയറക്ടറേറ്റ് ആശങ്ക പ്രകടിപ്പിച്ചു. ഇതേതുടർന്ന് മഴവെള്ള സംഭരണമടക്കം ജലലഭ്യതക്കായി മറ്റ്‌ ബദൽ സംവിധാനങ്ങളെ ആശ്രയിക്കാൻ ബെംഗളൂരു ജലവിതരണ – മലിനജല ബോർഡ് (ബിഡബ്ല്യുഎസ്എസ്ബി) ജനങ്ങൾക്ക് നിർദേശം നൽകി.
വേനൽ എത്തുന്നതിനു മുന്നേ തന്നെ നഗരത്തിലും സമീപ പ്രദേശങ്ങളിലും ഭൂഗർഭജല ചൂഷണം 100 ശതമാനമെന്ന പരിധിയിലേക്ക് എത്തിയിട്ടുണ്ട്. കഴിഞ്ഞ വർഷം നഗര – ഗ്രാമപ്രദേശങ്ങൾ ഉൾപ്പെടെയുള്ള ജില്ലകളിലായി ഭൂഗർഭജല ഉപയോഗത്തിൻ്റെ നിരക്ക് 100 ശതമാനം എത്തിയിരുന്നുവെന്ന് ബിഡബ്ല്യൂഎസ്എസ്ബി ഉദ്യോഗസ്ഥർ പറഞ്ഞു.
ഭാവിയിലെ ആവശ്യങ്ങൾക്ക് പോലും ഭൂഗർഭജലം തികയാത്ത സാഹചര്യങ്ങളിലേക്കാണ് ജലചൂഷണം നടക്കുന്നതെന്ന് വിദഗ്ധർ ചൂണ്ടിക്കാട്ടുന്നു. കർണാടകയുടെ മൊത്തത്തിലുള്ള ഭൂഗർഭജലചൂഷണം 68.4 ശതമാനമാണ്. 2023ൽ സംസ്ഥാനത്തെ ഭൂഗർഭജലചൂഷണം 66.3 ശതമാനമായിരുന്നു.
TAGS: BENGALURU | GROUNDWATER
SUMMARY: Groundwater exploitation in state heavy
