സംസ്ഥാനത്ത് അടുത്ത അഞ്ച് ദിവസത്തേക്ക് കനത്ത മഴയ്ക്ക് സാധ്യത

ബെംഗളൂരു: സംസ്ഥാനത്ത് അടുത്ത അഞ്ച് ദിവസം ശക്തമായ മഴക്ക് സാധ്യതയുള്ളതായി കാലാവസ്ഥ നിരീക്ഷണ കേന്ദ്രം അറിയിച്ചു. ബെംഗളൂരു ഉൾപ്പെടെ സംസ്ഥാനത്തിൻ്റെ തീരപ്രദേശങ്ങളിലും തെക്കൻ ഉൾപ്രദേശങ്ങളിലും ഓറഞ്ച് അലർട്ടും പ്രഖ്യാപിച്ചിട്ടുണ്ട്.

സംസ്ഥാനത്തെ 17 ജില്ലകളിൽ കാലാവസ്ഥാ നിരീക്ഷണ കേന്ദ്രം ജാഗ്രതാ നിർദേശം നൽകിയിട്ടുണ്ട്. കുടക്, ചിക്കമഗളൂരു, ശിവമോഗ പ്രദേശങ്ങളിൽ കനത്ത മഴയും ബെംഗളൂരു അർബൻ, ബെംഗളൂരു റൂറൽ, ചാമരാജനഗർ, കോലാർ, ചിക്കബെല്ലാപുർ, മൈസൂരു, ഹാസൻ, തുമകുരു, ചിത്രദുർഗ, മാണ്ഡ്യ, രാമനഗര, ദക്ഷിണ കന്നഡ, ഉഡുപ്പി എന്നിവിടങ്ങളിൽ ഇടിമിന്നലൊടു കൂടിയ മഴയ്ക്കും സാധ്യതയുണ്ട്.

തീരപ്രദേശങ്ങളിൽ മൂന്ന് ദിവസത്തേക്കും തെക്കൻ ഉൾനാടൻ ജില്ലകളിൽ അഞ്ച് ദിവസത്തേക്കും ഓറഞ്ച് അലർട്ട് പ്രഖ്യാപിച്ചിട്ടുണ്ട്. വടക്കൻ കർണാടകയിൽ നേരിയ മഴയാണ് പ്രതീക്ഷിക്കുന്നത്. ബെംഗളൂരു ഉൾപ്പെടെ സംസ്ഥാനത്തിൻ്റെ പല ഭാഗങ്ങളിലും ആഴ്ചയിൽ ശക്തമായ കാറ്റും ഇടിയും മിന്നലും ഉണ്ടാകുമെന്ന് കാലാവസ്ഥാ വകുപ്പ് അറിയിച്ചു.