ബെംഗളൂരു: സിനിമ ടിക്കറ്റുകൾക്ക് സെസ് ഏർപ്പെടുത്താനുള്ള സർക്കാർ തീരുമാനം തീയറ്ററുകൾക്ക് സാമ്പത്തിക നഷ്ടം വരുത്തുമെന്ന് കർണാടക ഫിലിം ചേംബർ ഓഫ് കോമേഴ്‌സ്. സിനിമ ടിക്കറ്റുകൾക്കും ഒടിടി സബ്സ്ക്രിപ്‌ഷനും രണ്ട് ശതമാനം സെസ് ചാർജ് ഏർപ്പെടുത്താൻ അടുത്തിടെ നിയമസഭ അനുമതി നൽകിയിരുന്നു. എന്നാൽ സംസ്ഥാനത്തെ 637 തിയറ്ററുകളിൽ 130 എണ്ണം അടച്ചുപൂട്ടലിൻ്റെ വക്കിലാണ്. പുതിയ തീരുമാനം ഇതിനകം തന്നെ പ്രതിസന്ധിയിലായ തീയറ്റർ വ്യവസായത്തെ കൂടുതൽ അപകടത്തിലാക്കുമെന്ന് ഫിലിം ചേംബർ ഓഫ് കോമേഴ്‌സ് പ്രസിഡൻ്റ് എൻ.എം. സുരേഷ് പറഞ്ഞു.
കർണാടക സിനി ആൻഡ് കൾച്ചറൽ ആക്ടിവിസ്റ്റ്സ് (ക്ഷേമം) സംഘടിപ്പിച്ച വാർത്താ സമ്മേളനത്തിലാണ് സുരേഷ് ഇക്കാര്യം പറഞ്ഞത്. സെസ് ഏർപ്പെടുത്താൻ നിർദ്ദേശിക്കുന്ന ബിൽ ജൂലൈ 23ന് നിയമസഭാ സമ്മേളനത്തിൽ പാസാക്കിയിരുന്നു. ഇത് നിയമമാകാൻ ഗവർണറുടെ അനുമതിക്കായി കാത്തിരിക്കുകയാണ്. എന്നാൽ ഇതിന് മുമ്പ് തന്നെ ബിൽ പിൻവലിക്കാൻ സർക്കാരിനോട് ആവശ്യപ്പെടുമെന്ന് അദ്ദേഹം പറഞ്ഞു. തൊഴിലാളികളുടെ ക്ഷേമനിധി രൂപീകരിക്കുന്നത് അനിവാര്യമാണെങ്കിലും, നിർമ്മാതാക്കൾക്കും, തീയറ്റർ ഉടമകൾക്കും അത് ഭാരമാകരുതെന്നും അദ്ദേഹം കൂട്ടിച്ചേർത്തു.
TAGS: KARNATAKA | CESS
SUMMARY: Karnataka film chamber opposes govt move to levy up to 2% cess
