നാല് പൊതുമേഖലാ ബാങ്കുകൾ കൂടി ലയിപ്പിച്ചേക്കും; ബാങ്കുകള്‍ ഇവ

ന്യൂഡല്‍ഹി: രാജ്യത്തെ നാല് പൊതുമേഖലാ ബാങ്കുകളെ കൂടി ലയിപ്പിച്ചേക്കും. ഇതിന് വേണ്ടിയുള്ള നടപടികളിലേക്ക് കേന്ദ്ര സര്‍ക്കാര്‍ കടക്കുന്നതായി സൂചന. കഴിഞ്ഞ ദിവസം ബാങ്ക് മേധാവികളുടെ പ്രത്യേക യോഗം പാര്‍ലമെന്റി ഉപസമിതി വിളിച്ചു ചേര്‍ത്തിരുന്നു. ലയന ശേഷം ബാങ്കിങ് നിയന്ത്രണ നിയമപ്രകാരമുള്ള ചട്ടങ്ങളും നിയന്ത്രണങ്ങളും എങ്ങനെ ബാധകമാക്കാം എന്നത് സംബന്ധിച്ച് യോഗത്തില്‍ ചര്‍ച്ച നടത്തിയതായാണ് വിവരം. യൂണിയന്‍ ബാങ്ക് ഓഫ് ഇന്ത്യ, യൂകോ ബാങ്ക്, ബാങ്ക് ഓഫ് മഹാരാഷ്ട്ര, ബാങ്ക് ഓഫ് ഇന്ത്യ എന്നിവ ലയിപ്പിക്കുമെന്നാണ് അഭ്യൂഹം. അതേസമയം ഇത് സംബന്ധിച്ച് ഔദ്യോഗിക അറിയിപ്പുകള്‍ ഒന്നും പുറത്ത് വന്നിട്ടില്ല.യൂണിയന്‍ ബാങ്ക് ഓഫ് ഇന്ത്യ, യൂകോ ബാങ്ക് എന്നിവയുടെ പ്രതിനിധികളുമായി ജനുവരി രണ്ടിനും ബാങ്ക് ഓഫ് മഹാരാഷ്ട്ര, ബാങ്ക് ഓഫ് ഇന്ത്യ എന്നിവയുടെ പ്രതിനിധികളുമായി ജനുവരി 6നും ഗോവയില്‍ കൂടിക്കാഴ്ച നടക്കുമെന്നാണ് വിവരം.

പൊതുമേഖലയില്‍ 27 ബാങ്കുകളാണ് 2017 വരെ ഇന്ത്യയിലുണ്ടായിരുന്നത്. 12 എണ്ണം മാത്രമാണ് ഇപ്പോള്‍ പൊതുമേഖലയില്‍ ഉള്ളത്. 2017 ഏപ്രിലിലാണ് തിരുവനന്തപുരം ആസ്ഥാനമായ സ്റ്റേറ്റ് ബാങ്ക് ഓഫ് ട്രാവന്‍കൂര്‍ (SBT/എസ്.ബി.ടി) അടക്കം 5 അസോസിയേറ്റ് ബാങ്കുകളെയും ഭാരതീയ മഹിളാ ബാങ്കിനെയും കേന്ദ്രം മാതൃബാങ്കായ എസ്.ബി.ഐയില്‍ ലയിപ്പിച്ചത്. തുടര്‍ന്ന് 2019 ഏപ്രിലില്‍ ദേന ബാങ്ക്, വിജയ ബാങ്ക് എന്നിവയെ ബാങ്ക് ഓഫ് ബറോഡയില്‍ ലയിപ്പിച്ചു. 2020 ഏപ്രിലില്‍ 10 ബാങ്കുകളെ ലയിപ്പിച്ച് 4 വലിയ ബാങ്കുകളാക്കി. ഓറിയന്റല്‍ ബാങ്ക് ഓഫ് കൊമേഴ്സ്, യുണൈറ്റഡ് ബാങ്ക് ഓഫ് ഇന്ത്യ എന്നിവ പഞ്ചാബ് നാഷണല്‍ ബാങ്കിലും സിന്‍ഡിക്കേറ്റ് ബാങ്ക് കനറാ ബാങ്കിലും അലഹബാദ് ബാങ്ക് ഇന്ത്യന്‍ ബാങ്കിലുമാണ് ലയിച്ചത്. ആന്ധ്രാബാങ്ക്, കോര്‍പ്പറേഷന്‍ ബാങ്ക് എന്നിവയെ യൂണിയന്‍ ബാങ്കിലും ലയിപ്പിച്ചു.