കര്‍ണാടകയില്‍ കനത്ത ചൂട്, അഞ്ച് ജില്ലകളില്‍  താപനില 40 ഡിഗ്രി സെൽഷ്യസിന് മുകളിൽ, ബീദറിൽ സൂര്യാഘാതമേറ്റ് യുവാവ് മരിച്ചു

ബെംഗളൂരു: കഠിന ചൂടില്‍ വെന്തുരുകി കര്‍ണാടക. സംസ്ഥാനത്തെ വിവിധ ജില്ലകളില്‍ താപനില കുത്തനെ ഉയര്‍ന്നു. ഞായറാഴ്ച അഞ്ച് ജില്ലകളിൽ താപനില 40 ഡിഗ്രി സെൽഷ്യസിന് മുകളിൽ കടന്നു. കലബുറഗിയിലാണ് എറ്റവും കൂടിയ ചൂട് അനുഭവപ്പെട്ടത്. 40.2 മുതൽ 41.7 ഡിഗ്രിയാണ് ജില്ലയിലെ താപനില. റായ്ച്ചൂർ, വിജയപുര, ബെല്ലാരി, ബാഗൽക്കോട്ട് ജില്ലകളിലും താപനില 40 ഡിഗ്രിയ്ക്ക് മുകളിലായിരുന്നു. സംസ്ഥാനത്ത് ഉഷ്ണതരംഗത്തിന് സാധ്യതയുണ്ടെന്നാണ് കാലാവസ്ഥാ വിദഗ്‌ധരുടെ മുന്നറിയിപ്പ്. തിങ്കളാഴ്ച ബെളഗാവി, ചിത്ര ദുർഗ, ഗദഗ്, കലബുഗറി എന്നിവിടങ്ങളിലായിരുന്നു കൂടിയ ചൂട്. വടക്കൻ കർണാടകയിലെ 5 ജില്ലകളിൽ ഉയർന്ന താപനില 40 ഡിഗ്രി സെൽഷ്യസ് പിന്നിട്ടതിനെ തുടർന്ന് ഇവിടങ്ങളിൽ യെലോ അലർട്ട് തുടരുകയാണ്.

ബെംഗളൂരുവിലും കടുത്ത ചൂടാണ് അനുഭവപ്പെട്ടത്. നഗരത്തിലെ ഉയർന്ന താപനില 36 ഡിഗ്രി സെൽഷ്യസാണ്. ഇന്നു 37 പിന്നിടുമെന്നാണ് പ്രവചനം. 2017 മാർച്ച് 8ലെ 37.2 ഡിഗ്രി സെൽഷ്യസും 1996 മാർച്ച് 29ലെ 37.3 ഡിഗ്രി സെൽഷ്യസുമാണ് ഇതിനു മുൻപു ബെംഗളൂരുവിൽ രേഖപ്പെടുത്തിയ ഉയർന്ന താപനില. തീരദേശ മേഖലകളായ മംഗളൂരു, കർവാർ, ഉഡു പ്പി എന്നിവിടങ്ങളിലും ഉയർന്ന താപനിലയാണ്. സംസ്ഥാനത്ത് ഇത്തവണ വേനൽമഴയുടെ ലഭ്യതയും വളരെ കുറവാണ്.

കനത്ത ചൂടില്‍ സുര്യാഘാതത്തെ തുടർന്നു വടക്കൻ കർണാടകയിലെ ബീദറിൽ യുവാവ് മരിച്ചു. യുപി സ്വദേശിയും കമലാനഗറിലെ സലൂൺ ജീവനക്കാരനുമായ മുഹമ്മദ് സമീറാണ് (20) ദേശീയ ഹൈവേയിൽ സൂര്യാതപമേറ്റു കുഴഞ്ഞുവീണു മരിച്ചത്. ആശുപത്രിയിൽ എത്തിച്ചെങ്കിലും മരിച്ചിരുന്നതായി പൊലീസ് പറഞ്ഞു. ബീദറിലെ ഉയർന്ന ചൂട് 41.6 ഡിഗ്രി സെൽഷ്യസാണ്.
SUMMARY: Severe heatwave in Karnataka, temperature above 40 degrees Celsius in five districts