കൊച്ചി: എക്സിറ്റ് പോൾ പ്രവചനങ്ങൾ എപ്പോഴും കൃത്യമാകണമെന്നില്ലെന്നും ജനങ്ങളുടെ വികസനത്തോടുള്ള ആഭിമുഖ്യം വോട്ടായി മാറുമെന്നും എൽ.ഡി.എഫ് കൺവീനർ ടി.പി. രാമകൃഷ്ണൻ. മുൻകാലങ്ങളിലെ തിരഞ്ഞെടുപ്പ് ഫലങ്ങൾ ചൂണ്ടിക്കാട്ടിയാണ് അദ്ദേഹം ഇക്കാര്യം വ്യക്തമാക്കിയത്. 2021-ൽ ഇടുക്കിയിലും കോഴിക്കോട്ടെ വിവിധ മണ്ഡലങ്ങളിലും എൽ.ഡി.എഫ് പരാജയപ്പെടുമെന്ന് പ്രവചനങ്ങളുണ്ടായിരുന്നെങ്കിലും ജനവിധി മറിച്ചായിരുന്നുവെന്ന് അദ്ദേഹം ഓർമ്മിപ്പിച്ചു.
കഴിഞ്ഞ പത്തു വർഷത്തെ ഭരണത്തിന് ശേഷം കേരളത്തിൽ എവിടെയും ഭരണവിരുദ്ധ വികാരമില്ലെന്നും, സർക്കാരിന്റെ വികസന പ്രവർത്തനങ്ങളും ജനക്ഷേമ നടപടികളും വോട്ടർമാർ അംഗീകരിക്കുമെന്നും അദ്ദേഹം പറഞ്ഞു. തിരഞ്ഞെടുപ്പ് ഫലം വരുന്നതിന് മുമ്പെ മുഖ്യമന്ത്രി പദത്തെച്ചൊല്ലി കോൺഗ്രസിനുള്ളിൽ നടക്കുന്ന തർക്കങ്ങൾ ജനാധിപത്യത്തെ പരിഹസിക്കുന്നതാണെന്ന് ടി.പി. രാമകൃഷ്ണൻ വിമർശിച്ചു.
കോഴിക്കോട് ജില്ലയിലെ മുഴുവൻ സീറ്റുകളിലും എൽ.ഡി.എഫ് വിജയിക്കുമെന്നും താൻ മത്സരിച്ച പേരാമ്പ്ര മണ്ഡലത്തിലെ വിജയം ഉറപ്പാണെന്നും അദ്ദേഹം പറഞ്ഞു. മതനിരപേക്ഷത സംരക്ഷിക്കുന്ന നിലപാടുകൾക്ക് ജനങ്ങൾ നൽകുന്ന പിന്തുണ ഇത്തവണ വലിയ വിജയത്തിന് കാരണമാകുമെന്നും അദ്ദേഹം കൂട്ടിച്ചേർത്തു.
SUMMARY: ‘poll results may not always be correct, development will become votes’: TP Ramakrishnan
