കന്യാകുമാരി: കന്യാകുമാരിയില് വിനോദയാത്രയ്ക്കെത്തിയ മലയാളി സഹോദരിമാരെ കടലില് മരിച്ചനിലയില് കണ്ടെത്തി. കോട്ടയം കിടങ്ങൂർ കുരിക്കാട്ടില് ആൻ ഫിലിപ്പ് (35), മീര ഫിലിപ്പ് (32) എന്നിവരാണ് മരിച്ചത്. ഞായറാഴ്ച മുതല് ഇരുവരേയും കാണാനില്ലായിരുന്നു. ഇന്ന് രാവിലെ കടലില് മൃതദേഹങ്ങള് പൊങ്ങിക്കിടക്കുന്നത് കണ്ട മത്സ്യത്തൊഴിലാളികളാണ് പോലീസിനെ വിവരമറിയിച്ചത്.
കഴിഞ്ഞ 15 വർഷമായി അമേരിക്കയില് സ്ഥിരതാമസക്കാരായ ഇരുവരും വേനലവധിക്കായി നാട്ടിലെത്തിയതായിരുന്നു. കുടുംബാംഗങ്ങള്ക്കൊപ്പം വിനോദയാത്രയ്ക്ക് എത്തിയ ഇവർ കന്യാകുമാരിയിലെ ഒരു ഹോംസ്റ്റേയിലാണ് താമസിച്ചിരുന്നത്. കഴിഞ്ഞ 26-ാം തീയതി വൈകുന്നേരം പുറത്തിറങ്ങിയ ഇരുവരും തിരികെ എത്താതിരുന്നതോടെ ബന്ധുക്കള് പോലീസില് പരാതി നല്കുകയായിരുന്നു.
കന്യാകുമാരി പോലീസും കോസ്റ്റല് പൊലീസും ചേർന്ന് കഴിഞ്ഞ ദിവസങ്ങളില് വ്യാപകമായ തിരച്ചില് നടത്തിവരികയായിരുന്നു. ഇതിനിടെയാണ് ഇന്ന് രാവിലെ മൃതദേഹങ്ങള് കണ്ടെത്തിയത്. മൃതദേഹങ്ങള് ഇൻക്വസ്റ്റ് നടപടികള്ക്കായി ആശുപത്രിയിലേക്ക് മാറ്റി. മരണകാരണം വ്യക്തമല്ല. സംഭവത്തില് പോലീസ് അന്വേഷണം ആരംഭിച്ചു.
SUMMARY: Malayali sisters missing in Kanyakumari found dead at sea
