ബെംഗളൂരു: കാവേരി കുടിവെള്ള വിതരണത്തിനായുള്ള പ്രധാന പൈപ്പ് ലൈനിൽ അടിയന്തര അറ്റകുറ്റപ്പണികൾ നടക്കുന്നതിനാൽ ജൂലൈ 22-ന് ബെംഗളൂരുവിലെ വിവിധ പ്രദേശങ്ങളിൽ കുടിവെള്ള വിതരണം താൽക്കാലികമായി തടസ്സപ്പെടുമെന്ന് ബെംഗളൂരു വാട്ടർ സപ്ലൈ ആൻഡ് സീവറേജ് ബോർഡ് (ബിഡബ്ല്യുഎസ്എസ്ബി) അറിയിച്ചു.
കാവേരി ജലവിതരണ സ്റ്റേജ്-IV, ഫേസ്-I-ന്റെ പൈപ്പ്ലൈനിൽ സ്ഥാപിച്ചിരിക്കുന്ന എയർ വാൽവിലും സ്ലൂയിസ് വാൽവിലും ചോർച്ച തടയുന്നതിനുള്ള അടിയന്തര അറ്റകുറ്റപ്പണികൾ നടക്കുന്നതിനാല് സ്റ്റേജ്-4, ഫേസ്-I-ലെ പമ്പിംഗ് സ്റ്റേഷനുകൾ ഇന്ന് രാവിലെ 6 മുതൽ വൈകുന്നേരം 6 മണി വരെ അടച്ചിടുന്നതിനാല് വിവിധ മേഖലകളിൽ വെള്ളം ലഭിക്കില്ലെന്നാണ് ബിഡബ്ല്യുഎസ്എസ്ബി അധികൃതരുടെ അറിയിപ്പ്.
രാജാജിനഗർ, മല്ലേശ്വരം, മഹാലക്ഷ്മി ലേഔട്ട്, യശ്വന്ത്പുര, വിജയനഗർ എന്നിവ ഉൾപ്പെടെ നഗരത്തിന്റെ വിവിധ ഭാഗങ്ങളെയാണ് കുടിവെള്ള വിതരണം ബാധിക്കുക. മറ്റ് ചില പ്രദേശങ്ങളിലും ജലവിതരണം വൈകുകയോ ലഭ്യത കുറയുകയോ ചെയ്യാൻ സാധ്യതയുണ്ടെന്നും ബോർഡ് അറിയിച്ചു.
കുടിവെള്ള വിതരണവുമായി ബന്ധപ്പെട്ട കൂടുതൽ വിവരങ്ങൾക്കും ബാധിത പ്രദേശങ്ങളുടെ സമ്പൂർണ പട്ടികയ്ക്കും ബി.ഡബ്ല്യു.എസ്.എസ്.ബി യുടെ ഔദ്യോഗിക അറിയിപ്പുകൾ പരിശോധിക്കണമെന്ന് ബോർഡ് നിർദേശിച്ചു.
SUMMARY: Cauvery drinking water supply to be disrupted in various areas of Bengaluru today
