ബെർലിൻ: ജർമ്മനിയിലെ വടക്കുപടിഞ്ഞാറൻ ഭാഗത്ത് വീടിന്റെ മേൽക്കൂരയിലേയ്ക്ക് ചെറുവിമാനം തകർന്നുവീണ് രണ്ടുപേർ മരിച്ചു. ഓൾഡൻബർഗിന് സമീപമുള്ള ഗാണ്ടർകെസിയിലെ ജനവാസ മേഖലയിലാണ് അപകടമുണ്ടായത്. വിമാനം നിയന്ത്രണം വിട്ട് ഒരു വീടിന്റെ ചെരിഞ്ഞ മേൽക്കൂരയിലേക്ക് മുൻവശം കൂട്ടിയിടിക്കുകയായിരുന്നു. ബ്രെമെൻ സ്വദേശികളായ 65 ,77-ഉം വയസ്സുള്ള രണ്ട് പുരുഷന്മാരാണ് വിമാനത്തിലുണ്ടായിരുന്നത്.
അപകടത്തിൽ ഒരാൾ മരിച്ചതായും മറ്റൊരാളെ കാണാതായെന്നുമാണ് പൊലീസ് ആദ്യം റിപ്പോർട്ട് ചെയ്തിരുന്നത്. എന്നാൽ, നീണ്ടതും സങ്കീർണ്ണവുമായ തെരച്ചിലിനും രക്ഷാപ്രവർത്തനങ്ങൾക്കും ശേഷമാണ് രണ്ട് പേരും മരണപ്പെട്ടതായി ഡെൽമെൻഹോസ്റ്റ് പൊലീസ് ഡിപ്പാർട്ട്മെന്റ് ഔദ്യോഗികമായി സ്ഥിരീകരിച്ചത്.
വീടിന്റെ മേൽക്കൂരയിൽ ഇടിച്ചുകയറിയ വിമാനാവശിഷ്ടങ്ങൾ സുരക്ഷിതമായി നീക്കം ചെയ്തു. അപകടത്തെ തുടർന്ന് സുരക്ഷാ മുൻകരുതലിന്റെ ഭാഗമായി ഒഴിപ്പിച്ച പ്രദേശത്തെ താമസക്കാർക്ക് പിന്നീട് തിരികെ വീടുകളിലേക്ക് മടങ്ങാൻ അധികൃതർ അനുമതി നൽകി. അപകടകാരണത്തെക്കുറിച്ച് സർക്കാർ അന്വേഷണം ആരംഭിച്ചിട്ടുണ്ട്.
SUMMARY: Two killed after small plane crashes into roof of house in Germany
