ബെംഗളൂരു: നഗരത്തിലെ രൂക്ഷമായ ഗതാഗതക്കുരുക്കിന് പരിഹാരം കാണുന്നതിനായി റാഗിഗുഡ്ഡ ജങ്ഷനിൽ നിന്ന് കനകപുര റോഡിലേക്ക് പുതിയ 18.5 കിലോമീറ്റർ മേൽപ്പാത നിർമിക്കാൻ പദ്ധതി തയ്യാറാക്കി കർണാടക സർക്കാർ. മാരേനഹള്ളി മെയിൻ റോഡിലെ റാഗിഗുഡ്ഡ ജങ്ഷനിൽ നിന്ന് ബി.ഡബ്ല്യു.എസ്.എസ്.ബി. പൈപ്പ്‌ലൈൻ റോഡ് വഴി തളഘട്ടപുര ജങ്ഷനിലെ കനകപുര മെയിൻ റോഡിലേക്കാണ് മേൽപ്പാത നിർദേശിച്ചിരിക്കുന്നത്. കനകപുര മെയിൻ റോഡിൽ ഇത് നൈസ് റോഡുമായി ബന്ധിപ്പിക്കും. നിലവിൽ ഈ മേഖലയിലെ റോഡിൽ വാഹനങ്ങൾ മണിക്കൂറിൽ ശരാശരി 8 മുതൽ 12 കിലോമീറ്റർ വേഗത്തിലാണ് സഞ്ചരിക്കുന്നത്; തിരക്കേറിയ സമയങ്ങളിൽ യാത്രയ്ക്ക് 60 മുതൽ 90 മിനിറ്റ് വരെ എടുക്കുന്ന സാഹചര്യത്തിലാണ് പുതിയ പദ്ധതി.
പദ്ധതിക്കായി ബെംഗളൂരു സ്മാർട്ട് ഇൻഫ്രാസ്ട്രക്ചർ ലിമിറ്റഡ് ടെൻഡർ ക്ഷണിച്ചിട്ടുണ്ട്. ഏകദേശം 2,283.19 കോടി രൂപയാണ് പദ്ധതിയുടെ കണക്കാക്കിയ ചെലവ്. ഭൂമി ഏറ്റെടുക്കുന്നതിനും വിവിധ സേവനങ്ങളുടെ പൈപ്പുകളും വൈദ്യുതി ലൈനുകളും മാറ്റുന്നതിനുമുള്ള ചെലവ് ഇതിൽ ഉൾപ്പെടുന്നില്ല. ടോൾ അടിസ്ഥാനത്തിൽ സ്വകാര്യ പങ്കാളിത്തത്തോടെ പദ്ധതി നടപ്പാക്കാനാണ് സർക്കാർ ഉദ്ദേശിക്കുന്നത്. സ്വകാര്യ നിക്ഷേപകരെ ആകർഷിക്കുന്നതിനായി പദ്ധതിച്ചെലവിന്റെ പരമാവധി 40 ശതമാനം വരെ സർക്കാർ ധനസഹായം നൽകും. ഇത് ഏകദേശം 913 കോടി രൂപ വരും.
പദ്ധതി പൂർത്തിയാക്കാൻ 30 മാസമാണ് നിർദേശിച്ചിരിക്കുന്നത്. മഴക്കാലവും നിർമാണ കാലയളവിൽ ഉൾപ്പെടുത്തിയിട്ടുണ്ട്. റാഗിഗുഡ്ഡ മുതൽ കനകപുര റോഡ് വരെയുള്ള നിലവിലെ തിരക്കേറിയ പാതയ്ക്ക് ബദൽ ഗതാഗതമാർഗം ഒരുക്കുകയും യാത്രാസമയം കുറയ്ക്കുകയുമാണ് പ്രധാന ലക്ഷ്യം.
കനകപുര റോഡിലൂടെ നിലവിൽ നമ്മ മെട്രോയുടെ ഗ്രീൻ ലൈൻ കടന്നുപോകുന്നതിനാൽ ഉപരിതല റോഡിന്റെ വികസനത്തിന് പരിമിതികളുണ്ട്. ഈ സാഹചര്യത്തിലാണ് ബി.ഡബ്ല്യു.എസ്.എസ്.ബി. പൈപ്പ്‌ലൈൻ റോഡിന്റെ ഭാഗങ്ങൾ ഉപയോഗപ്പെടുത്തി അതിന് സമാന്തരമായി പുതിയ ഉയർന്ന പാത ഒരുക്കാനുള്ള നീക്കം.
പദ്ധതി ടോൾ അടിസ്ഥാനത്തിലായിരിക്കും. അതിനാൽ മേൽപ്പാത ഉപയോഗിക്കുന്ന വാഹനങ്ങളിൽ നിന്ന് യാത്രയ്ക്കായി ടോൾ ഈടാക്കും. ടെൻഡർ സമർപ്പിക്കാനുള്ള അവസാന തീയതി സെപ്റ്റംബർ 23 ആണ്. സാങ്കേതിക ടെൻഡറുകൾ സെപ്റ്റംബർ 24ന് തുറക്കും.
റാഗിഗുഡ്ഡ–കനകപുര റോഡ് മേൽപ്പാത ബെംഗളൂരുവിൽ സർക്കാർ ആസൂത്രണം ചെയ്യുന്ന 13 ഉയർന്ന പാത പദ്ധതികളിൽ ഒന്നാണ്. ആകെ 126 കിലോമീറ്ററിലധികം ദൈർഘ്യമുള്ള ഈ പദ്ധതികൾക്കായി ഏകദേശം 18,000 കോടി രൂപയുടെ നിക്ഷേപമാണ് സർക്കാർ ലക്ഷ്യമിടുന്നത്. .
SUMMARY: New flyover on Bengaluru–Ragigudda–Kanakapura road; 18.5 km long
