തൃക്കാക്കര: കോളജിലെ അധ്യാപകരുടെയും വിദ്യാർഥികളുടെയും ചിത്രങ്ങള്‍ മോർഫ് ചെയ്ത് അശ്ലീല ചിത്രങ്ങളാക്കി സമൂഹമാധ്യമങ്ങളില്‍ പ്രചരിപ്പിച്ചെന്ന പരാതിയില്‍ കെഎസ്‌യു നേതാവ് അറസ്റ്റില്‍. തൃക്കാക്കര ഭാരത് മാതാ കോളജിലെ രണ്ടാം വർഷ ബിബിഎ വിദ്യാർഥിയും കെഎസ്‌യു യൂണിറ്റ് മീഡിയ കോ-ഓർഡിനേറ്ററും വീഡിയോ എഡിറ്ററുമായ ശ്രീഹരിയെയാണ് പോലീസ് പിടികൂടിയത്.
2025 ഡിസംബർ ഒന്ന് മുതല്‍ 2026 സെപ്റ്റംബർ രണ്ട് വരെയുള്ള കാലയളവിലാണ് കേസിനാസ്പദമായ സംഭവങ്ങള്‍ നടന്നത്. കോളജ് പരിപാടികളുടെ വീഡിയോ ചിത്രീകരിച്ച ശേഷം അതില്‍നിന്ന് അധ്യാപകരുടെയും വിദ്യാർഥികളുടെയും ചിത്രങ്ങള്‍ എടുത്ത് മോർഫ് ചെയ്ത് അശ്ലീല ചിത്രങ്ങളാക്കി ടെലിഗ്രാമിലൂടെ പ്രചരിപ്പിക്കുകയായിരുന്നു.
അന്വേഷണത്തിനിടെ ശ്രീഹരിയുടെ മൊബൈല്‍ ഫോണില്‍നിന്ന് മോർഫ് ചെയ്ത ചിത്രങ്ങള്‍ കണ്ടെത്തിയതായി പോലീസ് അറിയിച്ചു. തുടർന്ന് കോളജ് അധികൃതർ ഇയാളെ പുറത്താക്കുകയും പിന്നീട് പോലീസ് കേസെടുക്കുകയുമായിരുന്നു. സംഭവം പുറത്തറിഞ്ഞതിന് പിന്നാലെ നടപടികള്‍ വൈകുന്നതില്‍ പ്രതിഷേധിച്ച്‌ വിദ്യാർഥികള്‍ രംഗത്തെത്തി. കേസില്‍ കൂടുതല്‍ പേർക്ക് പങ്കുണ്ടെന്നും പ്രതികളെ സംരക്ഷിക്കാൻ കോളജ് മാനേജ്മെന്റ് ശ്രമിക്കുന്നുവെന്നും ആരോപിച്ചായിരുന്നു പ്രതിഷേധം.
കുറ്റകൃത്യത്തില്‍ പങ്കുണ്ടെന്ന് ആരോപിക്കപ്പെടുന്ന ഒരു വിദ്യാർഥിയെ പരീക്ഷ എഴുതാൻ അനുവദിച്ചതും പ്രതിഷേധത്തിന് കാരണമായി. തുടർന്ന് വിദ്യാർഥികള്‍ പ്രിൻസിപ്പലിന്റെ ഓഫീസിന് മുന്നില്‍ കുത്തിയിരുന്ന് സമരം നടത്തി. വിദ്യാർഥി പ്രതിനിധികളും പോലീസും കോളജ് അധികൃതരും തമ്മില്‍ നടത്തിയ ചർച്ചയെ തുടർന്നാണ് സമരം അവസാനിപ്പിച്ചത്.
SUMMARY: KSU leader arrested for morphing photos of teachers and classmates
