ബെംഗളൂരു: സെന്റ് മേരീസ് ബസിലിക്കയിൽ പരിശുദ്ധ ദൈവ മാതാവിന്റെ വാര്‍ഷിക തിരുനാളിനോടനുബന്ധിച്ചുള്ള ഘോഷയാത്ര കണക്കിലെടുത്ത് ഇന്ന് ശിവാജിനഗര്‍ ഭാഗങ്ങളില്‍ ഗതാഗത നിയന്ത്രണം ഏർപ്പെടുത്തി. വൈകിട്ട് 1 മുതൽ രാത്രി 11 വരെ ശിവാജിനഗർ, റസ്സൽ മാർക്കറ്റ്, പരിസര പ്രദേശങ്ങളിൽ ഗതാഗതക്കുരുക്ക് ഉണ്ടാകാൻ സാധ്യതയുള്ളതിനാൽ വാഹനയാത്രക്കാർക്ക് ബെംഗളൂരു ട്രാഫിക് പോലീസ് ജാഗ്രതാ നിർദേശം നൽകി.
തിരുനാളിനോടനുബന്ധിച്ചുള്ള ഘോഷയാത്രയിലടക്കം വലിയ ജനത്തിരക്ക് പ്രതീക്ഷിക്കുന്നതിനാൽ ശിവാജിനഗർ മേഖലയിലെ പ്രധാന റോഡുകളിൽ വാഹനങ്ങളുടെ സഞ്ചാരത്തിന് നിയന്ത്രണമുണ്ടാകും. റസ്സൽ മാർക്കറ്റ്, ബ്രോഡ്‌വേ റോഡ്, ശിവാജിനഗർ ബസ് സ്റ്റാൻഡ്, സമീപ റോഡുകൾ എന്നിവിടങ്ങളിൽ നിയന്ത്രണം ശക്തമാക്കും.
തിരുനാൾ ഘോഷയാത്ര കടന്നുപോകുന്ന റോഡുകളിൽ വാഹനങ്ങൾ നിർത്തിയിടുന്നതിനും നിയന്ത്രണമുണ്ടാകും. തിരക്ക് ഒഴിവാക്കുന്നതിനായി യാത്രക്കാർ സാധ്യമെങ്കിൽ പൊതുഗതാഗത സംവിധാനങ്ങൾ ഉപയോഗിക്കണമെന്ന് പോലീസ് നിർദേശിച്ചിട്ടുണ്ട്.
ശിവാജിനഗറും തൊട്ടടുത്ത സ്ഥലങ്ങളിലേക്കും യാത്ര ചെയ്യുന്നവർ യാത്രയ്ക്ക് അധിക സമയം മാറ്റിവെക്കണമെന്നും പോലീസ് നിർദേശിച്ചു. അടിയന്തര സേവന വാഹനങ്ങൾക്ക് ആവശ്യമായ സൗകര്യം ഉറപ്പാക്കുന്നതിനൊപ്പം ഗതാഗതം നിയന്ത്രിക്കാൻ അധിക പോലീസ് ഉദ്യോഗസ്ഥരെയും വിന്യസിച്ചിട്ടുണ്ട്.
തിരുനാള്‍ സമാപനത്തിന്റെ ഭാഗമായുള്ള പുഷ്പാലംകൃത രഥ ഘോഷയാത്ര വൈകിട്ട് 5.30നു ആരംഭിക്കും. ബെംഗളൂരു ആർച്ച് ബിഷപ് ഡോ. പീറ്റർ മച്ചാഡൊ മുഖ്യകാർമികത്വം വഹിക്കും. നഗരപ്രദക്ഷിണത്തിനു ശേഷം 8.30ന് ആശീർവാദം, തുടർന്നു കുർബാന എന്നിവയോടെ ഈ വര്‍ഷത്തെ ആഘോഷങ്ങള്‍ക്ക് സമാപനമാകും.
SUMMARY: St. Mary’s Basilica Festival: Traffic restrictions in Shivajinagar today
