ബെംഗളൂരു: ഗണേശോത്സവ ഘോഷയാത്രയ്ക്കിടെ പടക്കം പൊട്ടിത്തെറിച്ച് മൂന്നുപേർക്ക് ഗുരുതരപരുക്കേറ്റു. ചിക്കമഗളൂരുവിലെ ലക്ഷ്യ ഗ്രാമത്തിൽ വ്യാഴാഴ്ച വൈകിട്ട് നടന്ന ഗൗരമ്മ ഘോഷയാത്രയ്ക്കിടെയാണ് സംഭവം. രത്ന, മഞ്ജുനാഥ്, ഭാഗ്യ, എന്നിവർക്കാണ് ഗുരുതരമായി പരുക്കേറ്റത്.മഞ്ജുനാഥിന്റെ തലയ്ക്കും കണ്ണിനും മുഖത്തിനും പരുക്കേറ്റു. ഇയാളുടെ നില ഗുരുതരമാണെന്നും തുടർന്ന് കൂടുതൽ ചികിത്സയ്ക്കായി മംഗളൂരുവിലെ ഒരു സ്വകാര്യ ആശുപത്രിയിലേക്ക് മാറ്റിയെന്നും പോലീസ് പറഞ്ഞു. രത്ന, ഭാഗ്യ എന്നിവരുടെ പരുക്കും ഗുരുതരമാണ്. ഇവരെ ചിക്കമഗളൂരുവിലെ മല്ലെഗൗഡ ജില്ലാ സർക്കാർ ആശുപത്രിയിൽ പ്രവേശിപ്പിച്ചു.
ഗണേശ വിഗ്രഹം നിമജ്ജനം ചെയ്തതിനുശേഷമാണ് ഗൗരമ്മ ഘോഷയാത്ര നടത്താറുള്ളത്. പുലർച്ചെ വരെ നീണ്ടുനിൽക്കുന്ന ഘോഷയാത്രയ്ക്കും നിമജ്ജന ചടങ്ങിനും സാക്ഷ്യം വഹിക്കാൻ ആയിരക്കണക്കിന് ആളുകളാണ് ഈ ഗ്രാമത്തിൽ ഒത്തുകൂടാറുള്ളത്. ഘോഷയാത്ര മുന്നോട്ട് പോകുമ്പോഴാണ് ആ വെടിക്കെട്ട് അപകടം സംഭവിച്ചത്.
SUMMARY: Three people seriously injured after firecrackers went off during Ganesha procession
