ബെംഗളൂരു: കർണാടക മഹിളാ കോൺഗ്രസ് അധ്യക്ഷ സൗമ്യ റെഡ്ഡി റെഡ്ഡി രാജിവച്ചു. കർണാടകയിൽ വനിതകൾക്ക് മന്ത്രിസഭയിൽ പ്രാതിനിധ്യം ലഭിക്കാത്തത് ചർച്ചയാകുന്നതിനിടെയാണ് സൗമ്യ റെഡ്ഡിയുടെ നടപടി. സംസ്ഥാനത്ത് വനിതാ നേതാക്കൾക്കും പ്രവർത്തകർക്കും കൂടുതൽ രാഷ്ട്രീയ പ്രാതിനിധ്യം ഉറപ്പാക്കണമെന്ന ആവശ്യം കോൺഗ്രസിനുള്ളിലും ഉയർന്നുവരുന്ന സാഹചര്യത്തിലാണ് രാജിക്കത്ത് ശ്രദ്ധ നേടുന്നത്.
പുതിയ മഹിളാ കോൺഗ്രസ് അധ്യക്ഷയെ നിയമിക്കുന്നതുവരെ സംഘടനയുടെ പ്രവർത്തനങ്ങൾ മുന്നോട്ടുകൊണ്ടുപോകാൻ തയ്യാറാണെന്ന് സൗമ്യ റെഡ്ഡി രാജിക്കത്തിൽ വ്യക്തമാക്കിയതായാണ് റിപ്പോർട്ട്. രാജി അംഗീകരിച്ചിട്ടുണ്ടോ എന്ന കാര്യത്തിൽ വ്യക്തത വന്നിട്ടില്ല.
കർണാടക മന്ത്രിസഭയിലെ വനിതാ പ്രാതിനിധ്യക്കുറവ് രാഷ്ട്രീയ ചർച്ചകൾക്ക് വഴിവെച്ചിട്ടുണ്ട്. സ്ത്രീകളുടെ പ്രശ്നങ്ങൾ നയരൂപീകരണത്തിലും ഭരണനിർവഹണത്തിലും കൂടുതൽ ഫലപ്രദമായി പ്രതിഫലിക്കണമെന്ന ആവശ്യവും ഇതോടെ വീണ്ടും ഉയരുന്നു.
സൗമ്യ റെഡ്ഡിയുടെ രാജിക്കത്ത് കോൺഗ്രസ് നേതൃത്വം എങ്ങനെ പരിഗണിക്കുമെന്നതും സംസ്ഥാന മഹിളാ കോൺഗ്രസിന്റെ അടുത്ത അധ്യക്ഷയായി ആരെത്തുമെന്നതും ഇനി ശ്രദ്ധേയമാണ്.
ബെംഗളൂരുവിൽനിന്നുള്ള മുൻ എം.എൽ.എ.യാണ് സൗമ്യാ റെഡ്ഡി. വനം, പരിസ്ഥിതി വകുപ്പ് മന്ത്രി രാമലിംഗ റെഡ്ഡിയുടെ മകളാണ്.
