പ്രമോദ് മഹാജന്റെ കൊലപാതകം: വലിയ ഗൂഢാലോചന നടന്നുവെന്ന ആരോപണവുമായി മകള്‍

മുംബൈ: പ്രമോദ് മഹാജന്റെ കൊലപാതകം വലിയ ഗൂഢാലോചനയാണെന്നും സത്യം പുറത്തുവരണമെന്നും ബി.ജെ.പി. മുന്‍ എം.പി.യും മകളുമായ പൂനം മഹാജന്‍ പറഞ്ഞു. സമഗ്രമായ അന്വേഷണത്തിനായി ആഭ്യന്തരമന്ത്രിക്ക് കത്തെഴുതുമെന്നും അവര്‍ പറഞ്ഞു.

‘ബാലിശമായ കാരണങ്ങള്‍ ചൂണ്ടിക്കാട്ടി ഗൂഢാലോചന മറച്ചുവച്ചിരിക്കുകയാണ്. ഇന്നല്ലെങ്കില്‍ നാളെ സത്യം പുറത്തുവരിക തന്നെ ചെയ്യും. സാമ്പത്തികമോ അസൂയയോ കുടുംബപ്രശ്‌നങ്ങളോ അല്ല കൊലപാതകത്തിനു പിന്നില്‍.’- മാധ്യമ പ്രവര്‍ത്തകരോടു സംസാരിക്കവേ പൂനം പറഞ്ഞു.

രാജ്യസഭാംഗവും ബിജെപി ദേശീയ ജനറല്‍ സെക്രട്ടറിയുമായിരുന്ന  പ്രമോദ് മഹാജനെ 2006 ഏപ്രില്‍ 22-ന് സഹോദരന്‍ പ്രവീണ്‍ മഹാജനാണ് വെടിവെച്ചുകൊന്നത്. വാജ്പേയിയുടെ മന്ത്രിസഭയില്‍ ടെലികമ്യൂണിക്കേഷന്‍ മന്ത്രിയെന്നനിലയില്‍ അദ്ദേഹം ഇന്ത്യയുടെ സെല്ലുലാര്‍ വിപ്ലവത്തില്‍ പ്രധാനപങ്കുവഹിച്ചു.

അതേസമയം ഗൂഢാലോചന നടന്നതിന് എന്തെങ്കിലും തെളിവുകള്‍ കൈവശമുണ്ടെങ്കില്‍ നല്‍കണമെന്ന് ബിജെപി മന്ത്രി സുധീര്‍ മുങ്കന്തിവാര്‍ ആവശ്യപ്പെട്ടു.
<BR>
TAGS : POONAM MAHAJAN|  PRAMOD MAHAJAN
SUMMARY : Pramod Mahajan’s murder: Daughter alleges that there was a big conspiracy