ഇടുക്കി: മൂലമറ്റത്ത് തേക്കിൻകൂപ്പില് പായയില് പൊതിഞ്ഞ രീതിയില് മൃതദേഹം കണ്ടെത്തിയ സംഭവം കൊലപാതകമെന്ന് പോലീസ്. മരിച്ചത് കോട്ടയം ജില്ലയിലെ മേലുകാവ് സ്വദേശിയായ സാജൻ സാമുവലിനെയാണ്. സംഭവത്തില് 6 പേരെ പോലീസ് കസ്റ്റഡിയില് എടുത്തിട്ടുണ്ട്.
ഇവരെല്ലാം തന്നെ കൊലപാതകത്തില് നേരിട്ട് പങ്കുള്ളവരാണ്. സംഘത്തില് 8 പേരാണ് ഉള്ളത്. കേസില് നിർണായകമായത് ഓട്ടോ ഡ്രൈവർ നല്കിയ മൊഴിയാണ്. മൃതദേഹം ഓട്ടോറിക്ഷയിലാണ് ഉപേക്ഷിക്കാനായി കൊണ്ടുപോയത്. സംശയം തോന്നിയ ഡ്രൈവറാണ് എസ് ഐയ്ക്ക് വിവരം നല്കിയത്. മൃതദേഹത്തിന് മൂന്ന് ദിവസത്തിലേറെ പഴക്കമുണ്ടായിരുന്നു.
ഇന്നലെയാണ് മൂലമറ്റം തേക്കുംകൂപ്പ് മൃതദേഹം പായയില് പൊതിഞ്ഞ നിലയില് കണ്ടെത്തുന്നത്. കഴിഞ്ഞ 30 നാണ് സാജന് സാമുവലിനെ കാണാതാകുന്നത്. മൃതദേഹം ജീര്ണിച്ച അവസ്ഥയിലുള്ളതിനാല് ഔദ്യോഗിക സ്ഥിരീകരണത്തിനായി ഡിഎന്എ പരിശോധന നടത്തും. അതേസമയം മൃതദേഹം സാജന്റേതാണെന്ന നിഗമനത്തിലാണ് പോലീസിന്റെ അന്വേഷണം മുന്നോട്ടു പോകുന്നത്.
മൂലമറ്റത്തെ മറ്റൊരിടത്തുവെച്ചാണ് കൃത്യം നടന്നത്. ഉറങ്ങിക്കിടന്ന സാജനെ തലയ്ക്ക് അടിച്ചു കൊലപ്പെടുത്തുകയായിരുന്നു എന്നാണ് പോലീസിന്റെ നിഗമനം. കാപ്പ ഉള്പ്പെടെ ചുമത്തപ്പെട്ടിട്ടുള്ള, ക്രിമിനല് പശ്ചാത്തലം ഉള്ള വ്യക്തിയാണ് സാജന് സാമുവല്. 30 ഓളം ക്രിമിനല് കേസുകളില് ഇയാള് പ്രതിയാണെന്ന് പോലീസ് സൂചിപ്പിച്ചു.
TAGS : CRIME
SUMMARY : The incident where the dead body was found wrapped in a mat; Police detained six people
