ബെംഗളൂരു: സ്വർണം വാങ്ങാനെന്ന വ്യാജേന മല്ലേശ്വരത്തെ ജ്വല്ലറിയിലെത്തി കവർച്ച നടത്തിയ യുവാവ് പിടിയിൽ. കുടക് വിരാജ്പേട്ട് സ്വദേശിയായ റിച്ചാർഡിനെ(25) ആണ് മല്ലേശ്വരം പോലീസ് അറസ്റ്റ് ചെയ്തത്. 13 ലക്ഷം രൂപ വിലയുള്ള സ്വർണാഭരണങ്ങൾ ഇയാളിൽ നിന്നു പിടിച്ചെടുത്തു.
ബെംഗളൂരുവിലെ കോളജിൽ നിന്ന് ബിടെക് ബിരുദം നേടിയ റിച്ചാർഡിനു ഒരു ലക്ഷം രൂപ മാസം ശമ്പളമുള്ള ജോലി ലഭിച്ചിരുന്നു. എന്നാൽ അത്യാഗ്രഹിയായ ഇയാൾ ജോലി ഉപേക്ഷിച്ച് മോഷണത്തിലേക്കു കടക്കുകയായിരുന്നു. ആഡംബര ജീവിതം നയിക്കാൻ എളുപ്പത്തിൽ പണം ഉണ്ടാക്കാനായിരുന്നു ഇതെന്നും പോലീസ് അറിയിച്ചു.
സുരക്ഷാ ജീവനക്കാരില്ലാത്ത ജ്വല്ലറികളാണ് മോഷണത്തിനായി ഇയാൾ തിരഞ്ഞെടുത്തിരുന്നത്. സ്വർണം വാങ്ങാനെന്ന വ്യാജേന ജ്വല്ലറികളിലെത്തി ജീവനക്കാരുടെ ശ്രദ്ധ തിരിച്ച ശേഷമാണ് മോഷണം നടത്തിയിരുന്നതെന്നും പോലീസ് പറയുന്നു. ബെംഗളൂരുവിലും കോട്ടയത്തുമായി ഇയാൾക്കെതിരെ ഒമ്പതോളം മോഷണകേസുകൾ നിലവിലുണ്ട്.
SUMMARY: Bengaluru BTech graduate quits Rs 1 lac salary job, turns jewel thief; arrested.
