ബെംഗളൂരു: നഗരത്തിലെ രണ്ടാം വിമാനത്താവളം നിർമിക്കുന്നതിനുള്ള നടപടിക്രമങ്ങൾ വേഗത്തിലാക്കാൻ കേന്ദ്രസർക്കാരിനെ സമീപിക്കാൻ സംസ്ഥാന സർക്കാർ. ഇതുസംബന്ധിച്ച് കേന്ദ്രമന്ത്രി രാം മോഹൻ നായിഡുവിനെ ഉടൻ കാണുമെന്ന് വ്യവസായമന്ത്രി എം.ബി. പാട്ടീൽ വ്യക്തമാക്കി.
പദ്ധതിക്കായി സർക്കാർ തിരഞ്ഞെടുത്ത 3 സ്ഥലങ്ങളുടെ സാധ്യതാപഠനം എയർപോർട്ട് അതോറിറ്റി ഓഫ് ഇന്ത്യ (എഎഐ) ഏപ്രിലിൽ നടത്തിയിരുന്നു. ഇതു സംബന്ധിച്ച റിപ്പോർട്ട് ജൂൺ 23ന് എഎഐ സിവിൽ വ്യോമയാന മന്ത്രാലയത്തിനു സമർപ്പിച്ചു. എന്നാൽ റിപ്പോർട്ട് ഇതുവരെയും സംസ്ഥാന സർക്കാരിനു ലഭിച്ചിട്ടില്ല. നടപടികൾ വേഗത്തിലാക്കാൻ വിമാനത്താവളത്തിനുള്ള സ്ഥലം എത്രയും വേഗം തിരഞ്ഞെടുക്കേണ്ടതുണ്ടെന്ന് മന്ത്രി എം.ബി. പാട്ടീൽ പറഞ്ഞു. കനക്പുര റോഡിലെ ഹാരോഹള്ളിയിലെ 2 ഇടങ്ങളും കുനിഗൽ റോഡിലെ നെലമംഗലയിലുമാണ് പുതിയ വിമാനത്താവളത്തിനായി പരിഗണിക്കുന്നത്.
SUMMARY: Minister MB Patil to meet civil aviation minister to speed up Bengaluru’s second international airport project.
