ബെംഗളൂരു: പരിശീലനത്തിനിടെ പാരച്യൂട്ട് തുറക്കാൻ സാധിക്കാത്തതിനെ തുടർന്ന് വ്യോമസേന ഉദ്യോഗസ്ഥൻ മരിച്ചു. ശിവമോഗ ഹൊസനഗര താലൂക്കിലെ ശങ്കുരുവിൽ നിന്നുള്ള ജി.എസ്. മഞ്ജുനാഥ് (36) ആണ് മരിച്ചത്. ഉത്തർപ്രദേശിലെ ആഗ്രയിലുള്ള പാരാട്രൂപ്പർ പരിശീലന സ്കൂളിൽ നടന്ന പരിശീലനത്തിനിടെയാണ് അപകടമുണ്ടായത്. വ്യോമസേനയിലെ ജൂനിയർ വാറന്റ് ഓഫീസറാണ് മഞ്ജുനാഥ്.
2005 ൽ വ്യോമസേനയിൽ ചേർന്ന മഞ്ജുനാഥ് ജമ്മു കശ്മീർ, അസം, യു.പി., ഡൽഹി എന്നിവിടങ്ങളിൽ സേവനമനുഷ്ഠിച്ചിട്ടുണ്ട്. കഴിഞ്ഞ ഒന്നര മാസമായി ആഗ്രയിൽ പാരാ ജമ്പ് ഡിവിഷനിൽ സേവനമനുഷ്ഠിച്ചു വരികയായിരുന്നു. 18,000 അടി ഉയരത്തിൽ നിന്നും കാർഗോ വിമാനത്തിൽ പാരാ ജമ്പ് പരിശീലനത്തിനിടെയാണ് അപകടമുണ്ടായത്. 11 ജമ്പർമാർ സുരക്ഷിതമായി താഴേക്ക് ചാടിയപ്പോൾ മഞ്ജുനാഥിന്റെ പാരച്യൂട്ട് തകരാറിലാകുകയായിരുന്നു. മഞ്ജുനാഥിന്റെ മൃതദേഹം ആഗ്രയിൽ നിന്ന് ബെംഗളൂരുവിലേക്ക് എത്തിച്ചു. ഹൊസനഗരയിലെ മാവിനകൊപ്പ സർക്കിളിൽ സംസ്കാരം നടത്തി.
TAGS: AIRFORCE OFFICER DEATH
SUMMARY: Karnataka IAF officer dies as parachute fails to open during training
