ബെംഗളൂരു: ബെംഗളൂരു-തുമക്കൂരു ദേശീയപാതയിലെ പീനിയ മേൽപാലം ബലപ്പെടുത്തുന്ന പ്രവൃത്തികളുടെ ഭാഗമായുള്ള അവസാനവട്ട ഭാര പരിശോധനയ്ക്കായി നാളെ രാവിലെ 5 മണി മുതൽ 17 ന് രാവിലെ 11 മണി വരെ പൂർണമായി അടച്ചിടും.
ബദൽ മാര്ഗ്ഗങ്ങള്:
നെലമംഗല ഭാഗത്തു നിന്നു ബെംഗളൂരുവിലേക്കു പ്രവേശിക്കുന്ന വാഹനങ്ങൾ കെന്നമെറ്റൽ വിഡിയയിൽ നിന്നു സർവീസ് റോഡിലേക്കു പ്രവേശിച്ച് എയ്ത്ത് മൈൽ, ദാസറഹള്ളി, ജാലഹള്ളി ക്രോസ്, പീനിയ പൊലീസ് സ്റ്റേഷൻ, എസ്ആർഎസ് ജംക്ഷൻ വഴി ഗോരെഗുണ്ഡപാളയയിലെത്തണം.
ബെംഗളൂരുവിൽ നിന്നു നെലമംഗല ഭാഗത്തേക്കുള്ളവ സിഎംടിഐയിൽ നിന്നു സർവീസ് റോഡിൽ പ്രവേശിച്ച് എസ്ആർഎസ് ജംക്ഷൻ, പീനിയ പൊലീസ് സ്റ്റേഷൻ, ജാലഹള്ളി ക്രോസ്, ദാസറഹള്ളി, എയ്ത്ത് മൈൽ, പാർലെ ജി ടോൾ വഴി ദേശീയപാതയിൽ പ്രവേശിക്കണം.
2021 ഡിസംബറിൽ ആണ് മേല്പ്പാലം ആദ്യം പൂർണമായി അടച്ചിട്ടത്. പീനിയ മുതൽ നാഗസന്ദ്ര വരെയുള്ള 4.2 കിലോമീറ്റർ ദൂരം വരുന്ന പാലത്തിലെ തൂണുകൾക്കു ബലക്ഷയം കണ്ടതോടെയാണ് നടപടി. തുടർന്ന് താൽക്കാലിക അറ്റകുറ്റപ്പണികൾക്കു ശേഷം 2022 ഫെബ്രുവരിയിൽ ചെറുവാഹനങ്ങൾക്കു പ്രവേശനം അനുവദിച്ചെങ്കിലും ബസ്, ലോറി ഉൾപ്പെടെയുള്ള ഭാരവാഹനങ്ങൾക്കുള്ള നിരോധനം തുടർന്നു. 120 സ്പാനുകൾ വരുന്ന പാലം 38.5 കോടി രൂപ ചെലവഴിച്ചാണു ദേശീയപാത അതോറിറ്റി ബലപ്പെടുത്തിയത്. ഭാരപരിശോധന പൂർത്തിയാകുന്നതോടെ ഭാരവാഹനങ്ങൾക്കടക്കം പാലത്തിൽ പ്രവേശനം അനുവദിക്കും.
SUMMARY: Attention passengers; Peenya flyover will be completely closed from tomorrow till the 17th
