ആറ്റിങ്ങല്‍: ആറ്റിങ്ങല്‍ സ്വദേശിയായ യുവാവിനെ യുകെയില്‍ തടാകത്തില്‍ മരിച്ച നിലയില്‍ കണ്ടെത്തി. അവനവഞ്ചേരി സ്മൃതിയില്‍ ജയകുമാര്‍- ഷിംന ദമ്പതികളുടെ മകന്‍ വിഷ്ണു ജയകുമാറിനെ(26)യാണ് യുകെയിലെ സ്വാന്‍ വൈല്‍ തടാകത്തില്‍ മരിച്ച നിലയില്‍ കണ്ടെത്തിയത്. കഴിഞ്ഞ ശനിയാഴ്ച മുൻ സുഹൃത്തുക്കള്‍ക്കൊപ്പം പുറത്തുപോയ വിഷ്ണുവിനെ കാണാതായതിനെ തുടർന്ന് നടത്തിയ തിരച്ചിലിനൊടുവിലാണ് മൃതദേഹം കണ്ടെത്തിയത്.
ശനിയാഴ്ച സുഹൃത്തുക്കളോടൊപ്പം യാത്ര പോയ വിഷ്ണു ഞായറാഴ്ച വൈകിയിട്ടും താമസസ്ഥലത്ത് തിരിച്ചെത്തിയിരുന്നില്ല. തുടർന്ന് കൂടെ താമസിക്കുന്ന സുഹൃത്തുക്കള്‍ ഉടൻ തന്നെ പ്രാദേശിക പോലീസ് സ്റ്റേഷനില്‍ പരാതി നല്‍കി. തിരച്ചില്‍ തുടരുന്നതിനിടെ, തിങ്കളാഴ്ച വിഷ്ണുവിനൊപ്പം യാത്ര ചെയ്ത സുഹൃത്ത് തന്നെയാണ് വിഷ്ണു അപകടത്തില്‍പ്പെട്ട വിവരം നാട്ടിലെ വീട്ടില്‍ വിളിച്ച്‌ അറിയിച്ചത്.
ഇതിനു പിന്നാലെ ചൊവ്വാഴ്ച പോലീസ് നടത്തിയ വിശദമായ പരിശോധനയിലാണ് സ്വാൻ വൈല്‍ തടാകത്തില്‍ നിന്ന് മൃതദേഹം കണ്ടെടുത്തത്. വിഷ്ണുവിന്റെ മരണത്തെക്കുറിച്ചുള്ള കൂടുതല്‍ വിവരങ്ങള്‍ക്കായി ബ്രിട്ടീഷ് പോലീസിന്റെ അന്വേഷണം നടന്നുവരികയാണ്. നിയമപരമായ നടപടിക്രമങ്ങള്‍ പൂർത്തിയാക്കിയ ശേഷം മൃതദേഹം നാട്ടിലെത്തിക്കാനുള്ള ശ്രമങ്ങള്‍ പ്രവാസി സംഘടനകളുടെ സഹകരണത്തോടെ ആരംഭിച്ചിട്ടുണ്ട്.
SUMMARY: Attingal native found dead in lake in UK
