ബെംഗളൂരുവിലെ രണ്ടാം വിമാനത്താവളം: മൂന്ന് സ്ഥലങ്ങളില്‍ സാധ്യതാപഠനത്തിന് ടെൻഡർ ക്ഷണിച്ചു

ബെംഗളൂരു: ബെംഗളൂരുവിൽ പുതുതായി നിര്‍മ്മിക്കുന്ന രണ്ടാമത്തെ വിമാനത്താവളത്തിനു വേണ്ടിയുള്ള സ്ഥലം കണ്ടെത്തുന്നതിന് സാധ്യത പഠനം നടത്താൻ ടെൻഡർ വിളിച്ചു. കർണാടക സ്റ്റേറ്റ് ഇൻഡസ്ട്രിയൽ ആൻഡ് ഇൻഫ്രാസ്ട്രക്ചർ ഡെവലപ്‌മെന്റ് കോർപ്പറേഷൻ ( കെഎസ്ഐഐഡിസി) ആണ് ബെംഗളൂരു നഗരത്തിന്റെ പരിസര പ്രദേശങ്ങളിലുള്ള മൂന്ന് സ്ഥലങ്ങളുടെ സാധ്യതാ പഠനം നടത്താനായി ഒരു കണ്‍സള്‍ട്ടന്റിനെ നിയമിക്കാന്‍ ടെന്‍ഡര്‍ ക്ഷണിച്ചത്. എയർപോർട്ട് അതോറിറ്റി ഓഫ് ഇന്ത്യ ( എഎഐ ) നടത്തിയ പ്രാഥമിക പഠനത്തിന് ശേഷം വിശദമായ പഠനം നടത്താനാണ് ഈ നീക്കം.

രാജ്യത്ത് ദ്രുതഗതിയില്‍ വളരുന്ന മെട്രോപൊളിറ്റന്‍ നഗരങ്ങളിലൊന്നായ ബെംഗളൂരുവില്‍ ഭാവിയിലെ ആവശ്യങ്ങള്‍ കൂടി പരിഗണിച്ചാണ് പുതിയ വിമാനത്താവളം വരുന്നത്. മൂന്നു സ്ഥലങ്ങളാണ് എയര്‍പോര്‍ട്ട് അതോറിറ്റി ഓഫ് ഇന്ത്യ (എഎഐ) ബെംഗളൂരുവിലെ രണ്ടാമത്തെ വിമാനത്താവളത്തിനായി കണ്ടെത്തിയിട്ടുള്ളത്. കനകപുര റോഡിലെ ചൂഡഹള്ളി, സോമനഹള്ളി എന്നീ രണ്ട് പ്രദേശങ്ങളും തുമകൂരു റോഡിലെ നെലമംഗലയ്ക്ക് സമീപമുള്ള ഒരു പ്രദേശവും ഇതില്‍ ഉള്‍പ്പെടുന്നു. ഈ മൂന്ന് സ്ഥലങ്ങളിലും ഏകദേശം 4,500 ഏക്കര്‍ ഭൂമി സംസ്ഥാന സര്‍ക്കാര്‍ കണ്ടെത്തിയിട്ടുണ്ട്. ഇതില്‍ ഏതാണ് ഏറ്റവും അനുയോജ്യമായ സ്ഥലം എന്നാണ് ഇനി കണ്ടെത്താനുള്ളത്. കനകപുര റോഡിന് സമീപമുള്ള സ്ഥലങ്ങൾ അടുത്തടുത്താണ്. ഇവയെ ഒരുമിച്ച് പരിഗണിക്കുമോ എന്നും പഠനത്തിൽ വിലയിരുത്തും. ആവശ്യമെങ്കിൽ പുതിയ സ്ഥലങ്ങൾ കൂടി പരിഗണിക്കാമെന്നും കെഎസ്ഐഐഡിസി അറിയിച്ചിട്ടുണ്ട്. എന്നാൽ നിലവിൽ മറ്റ് സ്ഥലങ്ങളെക്കുറിച്ച് ആലോചിക്കുന്നില്ലെന്നാണ് സർക്കാരിന്റെ നിലപാട്.

സാധ്യതാ പഠനത്തിൽ പ്രധാനമായും നാല് കാര്യങ്ങളായിരിക്കും പരിഗണിക്കുക. എഎഐ നടത്തിയ പഠനത്തെ വിലയിരുത്തുക, സ്ഥലത്തിൻ്റെ സാങ്കേതിക സാധ്യതകൾ വിലയിരുത്തുക, സ്ഥലം തിരഞ്ഞെടുക്കുന്നതിനുള്ള തന്ത്രപരമായ രൂപരേഖ തയ്യാറാക്കുക, ഏറ്റവും അനുയോജ്യമായ സ്ഥലം കണ്ടെത്തുക എന്നിവയാണവ.

SUMMARY: Bengaluru’s second airport: These three locations on the list of possibilities