ബെംഗളൂരു: കെംപഗൗഡ അന്താരാഷ്ട്ര വിമാനത്താവളത്തിന് ഇ-മെയിലില്‍ ബോംബ് ഭീഷണി. വിമാനത്താവളത്തിലെ രണ്ടിടങ്ങളിൽ ബോംബ് വെച്ചിട്ടുണ്ടെന്നായിരുന്നു സന്ദേശം. മുംബൈ ഭീകരാക്രമണത്തിൽ തൂക്കിലേറ്റപ്പെട്ട അജ്മലിന്റെ അനുസ്മരണാർഥവും തമിഴ്‌നാട്ടിലെ യുട്യൂബർ സൗക്ക് ശങ്കറിനെ പോലീസ് അറസ്റ്റ് ചെയ്തതിന്റെ പേരിലുമാണ് ബോംബ് സ്ഫോടനം നടത്തുന്നതെന്നും ഇ-മെയിൽ സന്ദേശത്തിൽ പറഞ്ഞിരുന്നു. എന്നാൽ, പരിശോധനയിൽ സംശയകരമായി ഒന്നും കണ്ടെത്തിയില്ല. വിമാന സർവീസുകളെ ഇത് ബാധിച്ചില്ല.
അലക്സ് പോൾ മേനോൻ എന്ന പേരിലുള്ള ഇ-മെയിലിൽനിന്നാണ് വിമാനത്താവളം ടെർമിനൽ മാനേജർക്ക് മെയിൽ ലഭിച്ചത്. തമിഴ്‌നാട് സ്വദേശിയായ ഛത്തീസ്ഗഢ് കേഡർ ഐഎഎസ് ഉദ്യോഗസ്ഥനാണ് അലക്സ് പോൾ മേനോൻ. 13 വർഷം മുൻപ് മാവോവാദികൾ ഇദ്ദേഹത്തെ തട്ടിക്കൊണ്ടുപോയിരുന്നെങ്കിലും പിന്നീട് മോചിപ്പിച്ചു. ഇദ്ദേഹത്തിന്റെ പേരിൽ വ്യാജ ഇ-മെയിൽ വിലാസമുണ്ടാക്കിയാണ് ഭീഷണി സന്ദേശം അയച്ചതെന്നാണ് നിഗമനം. ഭീഷണി സന്ദേശം അയയ്ക്കാൻ ഉപയോഗിച്ച ഇമെയിൽ ഐഡിക്കെതിരെ കേസെടുത്തിട്ടുണ്ട്, അന്വേഷണം നടന്നുവരികയാണ്.
SUMMARY: Bomb threat at Bengaluru airport