പൂനെയില്‍ പാലം തകര്‍ന്നുവീണ് അപകടം; ആറ് വിനോദസഞ്ചാരികള്‍ മുങ്ങിമരിച്ചു

പൂനെ: മഹാരാഷ്ട്രയില്‍ പാലം തകർന്നുവീണ് 6 മരണം. പുനെയ്ക്ക് സമീപം ഇന്ദ്രയാനി നദിയ്ക്ക് കുറുകെയുള്ള പാലമാണ് ഞായറാഴ്ച വൈകിട്ടോടെ തകർന്ന് വീണത്. നിരവധി സഞ്ചാരികള്‍ ഇന്ദ്രായനി നദിയില്‍വീണു. സ്ഥലത്ത് ഫയർഫോഴ്സും നാട്ടുകാരും ചേർന്ന് രക്ഷാപ്രവർത്തനം ആരംഭിച്ചിരിക്കുകയാണ്. ഇതുവരെ 6 പേരെയാണ് രക്ഷപ്പെടുത്തിയത്.

കുറച്ചുനാളുകളായി തന്നെ പാലം തകർന്ന നിലയിലായിരുന്നു. അതുകൊണ്ടുതന്നെ പാലത്തിലൂടെ വാഹനങ്ങള്‍ കടന്നു പോകുന്നത് വിലക്കിയിരുന്നു. പൊതുവെ ടൂറിസ്റ്റുകള്‍ അധികമായി എത്തുന്ന ഒരു മേഖല കൂടിയാണ് ഇത്. എന്നിരുന്നാലും, കനത്ത മഴയും ജലനിരപ്പ് ഉയരുന്നതും കാരണം, നദി കരകവിഞ്ഞൊഴുകുന്നത് കാണാൻ നിരവധി ആളുകള്‍ ഇവിടെ എത്താറുണ്ടായിരുന്നു.

അത്തരത്തില്‍ എത്തിയ സഞ്ചാരികളാണ് ഇപ്പോള്‍ അപകടത്തില്‍പ്പെട്ടത്. നിരവധി ആളുകള്‍ പാലത്തില്‍ നില്‍ക്കുന്നതിനിടെ ആണ് നടപ്പാലം തകർന്നു വീണത്. പ്രദേശത്ത് കനത്ത മഴയായതിനാല്‍ നദിയില്‍ നല്ല കുത്തൊഴുക്ക് രൂപപ്പെട്ടിരുന്നു. ഈ സമയം പാലം തകർന്നു നദിയില്‍ വീണ സഞ്ചാരികള്‍ ഒഴുക്കില്‍പ്പെടുകയായിരുന്നു. 15 മുതല്‍ 20 വരെയുള്ളയാളുകള്‍ നദിയില്‍ വീണിട്ടുണ്ടെന്നാണ് ദൃക്‌സാക്ഷികള്‍ പറയുന്നത്.

SUMMARY: Bridge collapses in Pune; six tourists drown