ധർമസ്ഥലയില്‍ യൂട്യൂബർമാരെ ആക്രമിച്ച കേസ്; പ്രതികള്‍ക്ക് ഇടക്കാല ജാമ്യം 

മംഗളൂരു: ധർമസ്ഥലയില്‍ ചിത്രീകരണത്തിന് എത്തിയ  യൂട്യൂബർമാരെ ആക്രമിച്ച കേസിലെ 6 പ്രതികള്‍ക്ക് ഇടക്കാല ജാമ്യം അനുവദിച്ചു. പദ്മപ്രസാദ്, സുഹാസ്, ഗുരുപ്രസാദ്, ശശികുമാർ, കലന്ദർ, ചേതൻ എന്നിവര്‍ക്കാണ് ഇടക്കാല ജാമ്യം അനുവദിച്ചത്. ഇന്നലെ അറസ്റ്റിലായ പ്രതികളെ ബെല്‍ത്തങ്ങാടി മജിസ്‌ട്രേറ്റിന്റെ വസതിയിൽ ഹാജരാക്കിയപ്പോഴാണ് താൽക്കാലിക ജാമ്യം അനുവദിച്ചത്. പ്രതികളെ തിങ്കളാഴ്ച ബെല്‍ത്തങ്ങാടി കോടതിയിൽ ഹാജരാകാൻ നിർദ്ദേശം നൽകി.

ഓഗസ്റ്റ് 6-ന് ധർമ്മസ്ഥല പങ്കാള ക്രോസില്‍ വച്ചാണ് നാല് യൂട്യൂബർമാരെ ആക്രമിച്ചത്. അക്രമത്തിനിടെ ക്യാമറകൾ നശിപ്പിക്കുകയും ജീവന് ഭീഷണി മുഴക്കുകയും ചെയ്തിരുന്നു. ഏകദേശം 15 മുതൽ 50 വരെ വ്യക്തികൾ ഉൾപ്പെടുന്ന സംഘത്തിനെതിരെ ഭാരതീയ ന്യായ സംഹിത (ബിഎൻഎസ്) 190 വകുപ്പുകൾക്കൊപ്പം 189(2), 191(2), 115(2), 324(5), 352, 307 എന്നീ വകുപ്പുകൾ പ്രകാരമാണ് കേസ് രജിസ്റ്റർ ചെയ്തിരിക്കുന്നത്.
SUMMARY: Case of attack on YouTubers in Dharmasthala; Accused granted interim bail