കൊച്ചി: യുവസംവിധായകൻ ബെല്‍രാജ് കളരിക്കല്‍ അന്തരിച്ചു. ആദ്യ വെബ്സിരീസായ കാപ്പി സ്ക്വാഡ് ജിയോ ഹോട്ട്സ്റ്റാറില്‍ റിലീസായതിന് പിന്നാലെയാണ് വിയോഗം. 28 വയസായിരുന്നു. കൊച്ചിയിലെ ഹോട്ടല്‍ മുറിയിലാണ് ബെല്‍രാജിനെ മരിച്ച നിലയില്‍ കണ്ടെത്തിയത്. ഹൃദയാഘാതം ആണ് മരണകാരണം. കോട്ടയം മണിമല സ്വ‌ദേശിയാണ്.
സീരിസിന്റെ ഷോ ഡയറക്ടർ ശ്രീകാന്തിനൊപ്പമായിരുന്നു ബെല്‍രാജ് താമസിച്ചിരുന്നത്. മുറിയുടെ കോളിംഗ് ബെല്‍ പലതവണ അടിച്ചിട്ടും പ്രതികരണം ലഭിക്കാത്തതിനെ തുട‌‍ർന്ന് നടത്തിയ പരിശോധനയിലാണ് മരിച്ച നിലയില്‍ കണ്ടെത്തിയത്. നിഴല്‍, മധുരം, ഡാകിനി എന്നിങ്ങനെ നിരവധി ചിത്രങ്ങളില്‍ അസിസ്റ്റന്റെ് ഡയറക്ടറായി പ്രവർത്തിച്ചിട്ടുണ്ട്.
ബെല്‍രാജിന്റെ ആദ്യ വെബ്സീരിസായ കാപ്പി സ്ക്വാഡ് ഏതാനും ദിവസങ്ങള്‍ക്ക് മുമ്പാണ് ജിയോ ഹോട്ട്സ്റ്റാറില്‍ പ്രദർശനം ആരംഭിച്ചത്. ആറു വർഷം നീണ്ടുനിന്ന പ്രണയ ജീവിതത്തിന് പിന്നാലെ കഴിഞ്ഞ മാസമാണ് ബെല്‍രാജ് വിവാഹിതനായത്. റിനോഷ് ജോർജ്, അനഘ അജിത്ത്, ദിയ ദീപൻ, ജോയല്‍ ദീപൻ എന്നിവരാണ് ചിത്രത്തില്‍ പ്രധാന കഥാപാത്രങ്ങളായി എത്തിയത്. സീരിസിന്റെ നാല് ഭാഗങ്ങള്‍ ഇതിനകം പുറത്തിറങ്ങിയിരുന്നു.
SUMMARY: month after his wedding; ‘Coffee Squad’ director Belraj Kalarikkal passes away
