കോൺഗ്രസ് എംഎൽഎ എച്ച്.വൈ. മേട്ടി അന്തരിച്ചു

അഞ്ചുതവണ എംഎൽഎയും രണ്ടുതവണ മന്ത്രിയുമായിട്ടുണ്ട്. ആദ്യം ജനതാദളിലായിരുന്ന മേട്ടി 1989, 1994, 2004 തിരഞ്ഞെടുപ്പുകളിൽ ഗുളേദഗുഡ്ഡ മണ്ഡലത്തിന്റെ പ്രതിനിധിയായി നിയമസഭയിലെത്തി. 1994-ലെ എച്ച്.ഡി. ദേവഗൗഡയുടെ നേതൃത്വത്തിലുള്ള ജനതാദൾ മന്ത്രിസഭയിൽ വനംവകുപ്പ് മന്ത്രിയായി. മണ്ഡല പുനർനിർണയത്തിന് ശേഷം 2008ൽ കോൺഗ്രസ് ടിക്കറ്റിൽ ബാഗൽകോട്ടിൽ നിന്ന് മത്സരിച്ചെങ്കിലും പരാജയപ്പെട്ടു. 2013-ൽ ബാഗൽകോട്ട് മണ്ഡലത്തിൽനിന്ന് തിരഞ്ഞെടുക്കപ്പെട്ടു.

2013-ലെ സിദ്ധരാമയ്യ സർക്കാരിൽ എക്സൈസിന്റെ ചുമതലയുള്ള മന്ത്രിയായി. പക്ഷേ, 2016 ഡിസംബറിൽ രാജിവെക്കേണ്ടിവന്നു. ലൈംഗികാരോപണക്കേസിനെ തുടർന്നായിരുന്നു ഇത്. അദ്ദേഹമുൾപ്പെട്ടതായി പറയുന്ന ലൈംഗിക വീഡിയോ പുറത്തായത് വലിയ വിവാദമായി. എന്നാൽ, കേസന്വേഷിച്ച സിഐഡി ഇദ്ദേഹത്തെ കുറ്റവിമുക്തനാക്കി.

2018-ലെ നിയമസഭാതിരഞ്ഞെടുപ്പിൽ മത്സരിച്ചെങ്കിലും വിജയിക്കാനായില്ല. 2023-ലെ തിരഞ്ഞെടുപ്പിൽ വീണ്ടും ബാഗൽകോട്ടിന്റെ പ്രതിനിധിയായി നിയമസഭയിലെത്തി. മുഖ്യമന്ത്രി സിദ്ധരാമയ്യയുടെ അടുപ്പക്കാരനായി അറിയപ്പെടുന്ന നേതാവാണ് മേട്ടി. മേട്ടിയുടെ നിര്യാണമറിഞ്ഞയുടൻ സിദ്ധരാമയ്യ ആശുപത്രിയിലെത്തി ആദരാഞ്ജലിയർപ്പിച്ചു. ഉപമുഖ്യമന്ത്രി ഡി.കെ. ശിവകുമാർ, കേന്ദ്രമന്ത്രി എച്ച്.ഡി. കുമാരസ്വാമി എന്നിവരും അനുശോചിച്ചു.
SUMMARY: Congress MLA H.Y. Meti passes away