‘ഡ്രൈവിംഗ് ടെസ്റ്റ് പരിഷ്‌കരണം കേന്ദ്ര നിയമങ്ങള്‍ക്ക് വിരുദ്ധമല്ല’; പുതിയ സര്‍ക്കുലര്‍ അനുവദിക്കാതെ ഹൈക്കോടതി

കേരളത്തിൽ ഡ്രൈവിംഗ് ടെസ്റ്റ് പരിഷ്‌കരിച്ചു കൊണ്ടുള്ള സർക്കുലറിന് സ്റ്റേ ഇല്ല. ഡ്രൈവിംഗ് സ്‌കൂള്‍ ഉടമകളുടെയും പരിശീലകരുടെയും ആവശ്യം ഹൈക്കോടതി തള്ളി. മോട്ടോർ വാഹന വകുപ്പിന്റെ നടപടി ഹൈക്കോടതി ശരിവെക്കുകയായിരുന്നു. ട്രാൻസ്‌പോർട്ട് കമ്മീഷണർ ഇറക്കിയ സർക്കുലർ ചോദ്യം ചെയ്തുള്ള ഹർജികളിലാണ് ഹൈക്കോടതിയുടെ ഇടക്കാല വിധി.

ട്രാൻസ്‌പോർട്ട് കമ്മീഷണറുടെ സർക്കുലർ കേന്ദ്രനിയമത്തിന് വിരുദ്ധമാണെന്നും കേന്ദ്രമോട്ടോർ വാഹന ചട്ടത്തില്‍ മാറ്റം വരുത്താൻ സംസ്ഥാനത്തിന് അധികാരമില്ലെന്നുമാണ് ഹർജിക്കാരുടെ വാദങ്ങള്‍. എന്നാല്‍ സർക്കുലർ സ്‌റ്റേ ചെയ്യാൻ മതിയായ കാരണമില്ലെന്ന് ഹൈക്കോടതി ചൂണ്ടിക്കാട്ടി.

കാർ ടെസ്റ്റിന് നേരത്തെയുണ്ടായിരുന്ന എച്ച്‌ ടെസ്റ്റ് ഒഴിവാക്കിയായിരുന്നു പുതിയ പരിഷ്‌കാരം. പകരം സിഗ്‌സാഡ് ഡ്രൈവിംഗും പാർക്കിംഗും ഉള്‍പ്പെടുത്തി. ടെസ്റ്റിന് കാലില്‍ ഗിയറുള്ള വാഹനം ഉപയോഗിക്കണമെന്നും സർക്കുലറില്‍ പറഞ്ഞിരുന്നു.