പാക് ചാരസംഘടനയ്ക്ക് വിവരങ്ങള്‍ കൈമാറി; ആസാമില്‍ എയര്‍ഫോഴ്സ് മുൻ ഉദ്യോഗസ്ഥൻ അറസ്റ്റില്‍

ഡല്‍ഹി: ആസാമില്‍ പാക് ചാരസംഘടനയ്ക്ക് വിവരം കൈമാറിയ എയർഫോഴ്സ് മുൻ ഉദ്യോഗസ്ഥൻ അറസ്റ്റില്‍. തെസ്പുരിലെ പാടിയ പ്രദേശവാസിയായ കുലേന്ദ്ര ശർമയാണ് അറസ്റ്റിലായത്.‌ പോലീസിന്‍റെ തുടർച്ചയായ നിരീക്ഷണത്തിനും പ്രാഥമിക അന്വേഷണത്തിനും ശേഷമാണ് ഇയാളെ കസ്റ്റഡിയിലെടുത്തത്.

കുലേന്ദ്ര ശർമ, പാക്കിസ്ഥാൻ ചാര ഏജൻസിയുമായി ബന്ധമുള്ള വ്യക്തികളുമായി ബന്ധം പുലർത്തുകയും അവർക്ക് തന്ത്രപ്രധാനമായ വിവരങ്ങള്‍ നല്‍കുകയും ചെയ്തതായി അന്വേഷണ സംഘം കണ്ടെത്തി. ഇയാളുടെ മൊബൈല്‍ ഫോണില്‍ നിന്നും ലാപ്‌ടോപ്പില്‍ നിന്നും തെളിവുകള്‍ കണ്ടെടുത്തു. ചില വിവരങ്ങള്‍ ഡിലീറ്റ് ചെയ്തിട്ടുണ്ട്. ‌ശർമയുടെ പാക്കിസ്ഥാൻ ബന്ധങ്ങളെക്കുറിച്ചുള്ള സംശയം ശക്തമാണെങ്കിലും അന്വേഷണം പൂർത്തിയാകുന്നതുവരെ അത് സ്ഥിരീകരിക്കാൻ കഴിയില്ലെന്ന് അസമിലെ സോണിത്പൂരിലെ ഡെപ്യൂട്ടി പോലീസ് സൂപ്രണ്ട് ഹരിചരണ്‍ ഭൂമിജ് പറഞ്ഞു.

സുഖോയ് 30 സ്ക്വാഡ്രണ്‍ ഉള്‍പ്പെടെയുള്ള പ്രധാന വ്യോമസേനാ യൂണിറ്റുകള്‍ പ്രവർത്തിക്കുന്ന തേസ്പൂരിലെ വ്യോമസേനാ സ്റ്റേഷനില്‍ ജൂനിയർ വാറന്‍റ് ഓഫീസറായി ജോലി ചെയ്ത ശർമ, 2002 ല്‍ വിരമിച്ചു. തുടർന്ന് തേസ്പൂർ സർവകലാശാലയില്‍ കുറച്ചുകാലം ജോലി ചെയ്തിരുന്നു. ഭാരതീയ ന്യായ സംഹിത (ബിഎൻഎസ്) നിയമത്തിലെ നിരവധി വകുപ്പുകള്‍ പ്രകാരം ശർമയ്‌ക്കെതിരെ കേസ് രജിസ്റ്റർ ചെയ്തിട്ടുണ്ടെന്ന് പോലീസ് അറിയിച്ചു.

SUMMARY: Former Air Force officer arrested in Assam for passing information to Pakistani spy agency