ഡൽഹി: മുതിർന്ന കോണ്‍ഗ്രസ് നേതാവ് സോണിയാ ഗാന്ധിയുടെ ആത്മകഥയായ ‘ബിലോംഗിംഗ്’ ഹാർപ്പർ കോളിൻസ് ഇന്ത്യ പുറത്തിറക്കും. പുസ്തകം പ്രസിദ്ധീകരിക്കാനുള്ള കരാറില്‍ നിന്ന് പെൻഗ്വിൻ റാൻഡം ഹൗസ് ഇന്ത്യ പിന്മാറിയിരുന്നു. പെൻഗ്വിൻ റാൻഡം ഹൗസ് ഇന്ത്യ പിന്മാറിയ വാർത്ത ‘ദി ഇന്ത്യൻ എക്സ്പ്രസ്’ റിപ്പോർട്ട് ചെയ്ത് ഒരു ആഴ്ചയ്ക്ക് ശേഷമാണ് പ്രഖ്യാപനം.
2026 നവംബർ 10-ന് ‘ബിലോംഗിംഗ്: എ ജേർണി ഓഫ് ലവ് ബൈ സോണിയാ ഗാന്ധി’ എന്ന പുസ്തകം ഇന്ത്യയില്‍ പ്രസിദ്ധീകരിക്കുമെന്ന് പ്രസാധകർ എക്‌സില്‍ പങ്കുവെച്ച കുറിപ്പില്‍ വ്യക്തമാക്കി. ഏറ്റവും കൂടുതല്‍ കാത്തിരിക്കുന്ന രാഷ്ട്രീയ ആത്മകഥകളിലൊന്നാണ് ‘ബിലോംഗിംഗ്’ എന്നും സ്‌നേഹം, വ്യക്തിത്വം, കടമ, സ്വന്തമെന്ന തോന്നല്‍ എന്നിവയെക്കുറിച്ചുള്ള തികച്ചും വ്യക്തിപരമായ കഥയാണ് ഇത് പറയുന്നതെന്നും ഹാർപ്പർ കോളിൻസ് ഇന്ത്യ വ്യക്തമാക്കി.
പ്രസാധകർ നിർദ്ദേശിച്ച ചില എഡിറ്റോറിയല്‍ മാറ്റങ്ങളും ഭാഗങ്ങള്‍ ഒഴിവാക്കലുകളും സോണിയാ ഗാന്ധി നിരസിച്ചതിനെ തുടർന്നാണ് പെൻഗ്വിൻ റാൻഡം ഹൗസ് ഇന്ത്യയുമായുള്ള ഭിന്നതകള്‍ ആരംഭിച്ചത്. പുസ്തകത്തിന്റെ പ്രസിദ്ധീകരണവുമായി പെൻഗ്വിൻ മുന്നോട്ട് പോകില്ലെന്ന് ആദ്യം റിപ്പോർട്ട് ചെയ്തത് ഇന്ത്യൻ എക്സ്പ്രസ് ആയിരുന്നു. ഇന്ത്യയില്‍ പുസ്തകം പ്രസിദ്ധീകരിക്കുന്നതിനും വിതരണം ചെയ്യുന്നതിനുമുള്ള കരാർ അന്തിമമാക്കുന്നതിലേയ്ക്ക് ഹാർപ്പർ കോളിൻസ് എത്തിച്ചേർന്നതായി എക്സ്പ്രസ് റിപ്പോർട്ടില്‍ പരാമർശിച്ചിരുന്നു.
SUMMARY: HarperCollins will publish Sonia Gandhi’s autobiography
