ബെംഗളൂരു: ദസറ–ദീപാവലി ആഘോഷങ്ങൾക്ക് മുന്നോടിയായി കർണാടകയിൽ മധുരപലഹാര നിർമാണ കേന്ദ്രങ്ങളിൽ ഭക്ഷ്യസുരക്ഷാ വകുപ്പ് പരിശോധന ശക്തമാക്കി. ഒക്ടോബർ 15, 16 തീയതികളിലായി സംസ്ഥാനത്തെ 186 മധുരപലഹാര നിർമാണ സ്ഥാപനങ്ങളിൽ നടത്തിയ പരിശോധനയിൽ നിയമലംഘനങ്ങൾ കണ്ടെത്തിയതിനെ തുടർന്ന് 25 സ്ഥാപനങ്ങൾക്ക് നോട്ടീസ് നൽകി.
ഭക്ഷണം തയ്യാറാക്കുന്നതിലും സൂക്ഷിക്കുന്നതിലുമുള്ള ശുചിത്വക്കുറവ്, ജീവനക്കാരുടെ മെഡിക്കൽ ഫിറ്റ്നസ് സർട്ടിഫിക്കറ്റുകളുടെ അഭാവം, ഭക്ഷ്യവസ്തുക്കളിലെ ശരിയായ ലേബലിങ്ങിന്റെ കുറവ് തുടങ്ങിയവയാണ് പരിശോധനയിൽ കണ്ടെത്തിയ പ്രധാന പ്രശ്നങ്ങൾ. ഭക്ഷ്യസുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കുന്നതിനാണ് പരിശോധന നടത്തിയത്.
പരിശോധനയ്ക്കിടെ 270 ഭക്ഷ്യസാമ്പിളുകൾ ശേഖരിച്ച് ഗുണനിലവാര പരിശോധനയ്ക്കായി അയച്ചു. നിയമലംഘനങ്ങൾ കണ്ടെത്തിയ രണ്ട് സ്ഥാപനങ്ങൾക്ക് ആകെ 7,000 രൂപ പിഴയും ചുമത്തി. ശേഖരിച്ച സാമ്പിളുകളുടെ പരിശോധനാഫലങ്ങൾ കൂടി വിലയിരുത്തിയശേഷം തുടർനടപടികൾ സ്വീകരിക്കാനാണ് അധികൃതരുടെ നീക്കം.
ദീപാവലി ഉൾപ്പെടെയുള്ള ഉത്സവകാലത്ത് മധുരപലഹാരങ്ങളുടെ വിൽപ്പന വർധിക്കുന്ന സാഹചര്യത്തിലാണ് പരിശോധന ശക്തമാക്കിയത്. ഭക്ഷ്യവസ്തുക്കളുടെ ഗുണനിലവാരം, നിർമാണസ്ഥലങ്ങളിലെ ശുചിത്വം, സുരക്ഷിതമായ സംഭരണം എന്നിവ ഉറപ്പാക്കുകയാണ് ലക്ഷ്യം.
മധുരപലഹാരങ്ങൾ വാങ്ങുമ്പോൾ പാക്കറ്റിലെ നിർമാണ തീയതി, കാലാവധി, ചേരുവകൾ, ഭക്ഷ്യസുരക്ഷാ ലൈസൻസ് വിവരങ്ങൾ എന്നിവ പരിശോധിക്കണമെന്ന് അധികൃതർ ഉപഭോക്താക്കളോട് നിർദേശിക്കുന്നു. സംശയാസ്പദമായ ഭക്ഷ്യവസ്തുക്കൾ ശ്രദ്ധയിൽപ്പെട്ടാൽ ബന്ധപ്പെട്ട ഭക്ഷ്യസുരക്ഷാ വിഭാഗത്തെ അറിയിക്കണമെന്നും നിർദേശമുണ്ട്.
SUMMARY: Inspections at sweet-making units; notices issued to 25 establishments.
