കോട്ടയം: ജസ്ന ജെയിംസിൻ്റെ തിരോധാനവുമായി ബന്ധപ്പെട്ട് നിർണായക വെളിപ്പെടുത്തല്‍ നടത്തിയ മുണ്ടക്കയത്തെ ലോഡ്ജിലെ മുൻ ജീവനക്കാരിയുടെ മൊഴി സി.ബി.ഐ അന്വേഷണ സംഘം രേഖപ്പെടുത്തി. രണ്ടര മണിക്കൂറോളം സമയമെടുത്താണ് ജീവനക്കാരിയുടെ മൊഴിയെടുത്തത്. ജസ്നയെ കണ്ട സംഭവം വെളിപ്പെടുത്താന്‍ വൈകിയതില്‍ കുറ്റബോധം തോന്നുന്നുവെന്നും സിബിഐയോട് പറയാനുള്ളത് എല്ലാം പറഞ്ഞിട്ടുണ്ടെന്നും ജീവനക്കാരി പറഞ്ഞു.
തിരുവനന്തപുരത്ത് നിന്നുള്ള സിബിഐ സംഘമാണ് മൊഴി രേഖപ്പെടുത്തിയത്. ജസ്നയെ കാണാതാകുന്നതിന് ദിവസങ്ങള്‍ക്ക് മുമ്പ് മുണ്ടക്കയത്തെ ഒരു ലോഡ്ജില്‍ ജസ്നയുമായി സാമ്യമുള്ള ഒരു പെണ്‍കുട്ടിയെ കണ്ടിരുന്നതായാണ് ജീവനക്കാരിയുടെ വെളിപ്പെടുത്തല്‍. ഒരു സ്വകാര്യ ചാനലിനോടായിരുന്നു ജീവനക്കാരിയുടെ വെളിപ്പെടുത്തല്‍.
അഞ്ജാതനായ മറ്റൊരു യുവാവും പെണ്‍കുട്ടിയ്ക്കൊപ്പം ഉണ്ടായിരുന്നതായി ലോഡ്ജിലെ ജീവനക്കാരി വെളിപ്പെടുത്തിയിരുന്നു. പത്രത്തിലും മറ്റും വന്ന പടം കണ്ടാണ് പെണ്‍കുട്ടിയെ തിരിച്ചറിഞ്ഞതെന്നും വിവരം പിന്നീട് ലോഡ്ജ് ഉടമയോട് പറഞ്ഞപ്പോള്‍ പുറത്താരോടും പറയരുതെന്ന് വിലക്കിയതായും ഇവർ പറഞ്ഞിരുന്നു. എന്നാല്‍ തന്നോടുള്ള വ്യക്തി വൈരാഗ്യം കൊണ്ടാണ് ലോഡ്ജിലെ മുൻ ജീവനക്കാരി ഇത്തരത്തില്‍ ഒരു ആരോപണം തനിക്കെതിരെ ഉന്നയിച്ചതെന്നാണ് ലോഡ്ജ് ഉടമ പ്രതികരിച്ചത്.
TAGS : JASNA MISSING CASE | CBI
SUMMARY : Disclosure of meeting Jasna; CBI has taken the statement of former lodge employee
