രാജ്യത്ത് കാട്ടാനകള്‍ കൂടുതല്‍ കര്‍ണാടകയിലെന്ന് റിപ്പോര്‍ട്ട്

ബെംഗളൂരു: രാജ്യത്ത് എറ്റവും കൂടുതല്‍ കാട്ടാനകള്‍ കൂടുതല്‍ കര്‍ണാടകയിലെന്ന് സര്‍വേ റിപ്പോര്‍ട്ട്. ഇന്ത്യയില്‍ കാട്ടാനകളുടെ എണ്ണത്തില്‍ 18 ശതമാനം കുറവെന്നും റിപ്പോര്‍ട്ട്. ഓള്‍ ഇന്ത്യ സിന്‍ക്രണസ് എലിഫന്റ് എസ്റ്റിമേഷന്‍ പ്രകാരമാണ് ആനയുടെ എണ്ണത്തില്‍ കുറവു വന്നതായുള്ള കണ്ടെത്തല്‍. കേന്ദ്ര പരിസ്ഥിതി മന്ത്രാലയം, പ്രോജക്ട് എലിഫന്റ്, വൈല്‍ഡ്‌ലൈഫ് ഇന്‍സ്റ്റിറ്റ്യൂട്ട് ഓഫ് ഇന്ത്യ എന്നിവ സംയുക്തമായി നടത്തിയ സര്‍വേ റിപ്പോര്‍ട്ടാണ് കേന്ദ്ര സര്‍ക്കാര്‍ പുറത്തുവിട്ടത്. 2017-ല്‍ 27,312 ആയിരുന്നു ആനകളുടെ എണ്ണം. എന്നാല്‍, ഇപ്പോള്‍ അത് 22,446 ആയി കുറഞ്ഞു.

2021-ല്‍ ആരംഭിച്ച സര്‍വേയുടെ റിപ്പോര്‍ട്ട് നാല് വര്‍ഷങ്ങള്‍ക്ക് ശേഷം ചൊവ്വാഴ്ചയാണ് സര്‍ക്കാര്‍ പുറത്തിറക്കിയത്. മേഖലാടിസ്ഥാനത്തില്‍, പശ്ചിമഘട്ടത്തിലാണ് എറ്റവും കൂടുതല്‍ ആനകളുള്ളത് -11,934. തൊട്ടുപിന്നാലെ വടക്കുകിഴക്കന്‍ കുന്നുകളും ബ്രഹ്‌മപുത്ര വെള്ളപ്പൊക്ക സമതലങ്ങളുമാണ്.

ഇന്ത്യയില്‍ ദക്ഷിണേന്ത്യന്‍ സംസ്ഥാനങ്ങളാണ് ഏറ്റവും കൂടുതല്‍ ആനകള്‍ വസിക്കുന്നതെന്ന് പഠനം ചൂണ്ടിക്കാട്ടുന്നു. ഏറ്റവും കൂടുതല്‍ ആനകളുള്ളത് കര്‍ണാടകയിലാണ്. 6,013 ആനകളാണ് കര്‍ണാടകയില്‍. തൊട്ടുപിന്നാലെ അസം (4,159), തമിഴ്‌നാട് (3,136), കേരളം (2,785), ഉത്തരാഖണ്ഡ് (1,792) എന്നീ സംസ്ഥാനങ്ങളാണുള്ളത്.

ലോകത്തിലെ ശേഷിക്കുന്ന ഏഷ്യന്‍ ആനകളില്‍ 60 ശതമാനത്തിലധികം ഇന്ത്യയിലാണ്. എന്നാല്‍, കൈയേറ്റം, കാട് കൈയ്യേറിയുള്ള അടിസ്ഥാന സൗകര്യ പദ്ധതികള്‍, മനുഷ്യ -ആന സംഘര്‍ഷം എന്നിവ കാരണം അവയുടെ ആവാസ വ്യവസ്ഥകള്‍ ചുരുങ്ങിക്കൊണ്ടിരിക്കുകയാണെന്നും സര്‍വേ റിപ്പോര്‍ട്ട് ചൂണ്ടിക്കാട്ടുന്നു. ഇത് ആനകളുടെ എണ്ണത്തില്‍ കുറവു വരാനുള്ള കാരണമായി പഠനത്തില്‍ ചൂണ്ടിക്കാട്ടുന്നു.
SUMMARY: Karnataka has the highest number of wild elephants in the country, says report