ബെംഗളൂരു: കർണാടക ആർടിസി ജീവനക്കാർ ഓഗസ്റ്റ് 5 മുതൽ അനിശ്ചിതകാല പണിമുടക്ക് പ്രഖ്യാപിച്ചു. കേരളത്തിലേക്കുള്ള യാത്രയെ ഉൾപ്പെടെ സമരം ബാധിച്ചേക്കും. 6 തൊഴിലാളി സംഘടനകളുടെ സംയുക്ത സമിതിയാണ് സമരം പ്രഖ്യാപിച്ചത്. ദീർഘകാലമായി തങ്ങൾ ഉന്നയിക്കുന്ന ആവശ്യങ്ങൾ അംഗീകരിക്കാൻ സംസ്ഥാന സർക്കാർ തയാറാകാത്തതിൽ പ്രതിഷേധിച്ചാണ് നടപടി.
ജൂലൈ 4ന് മുഖ്യമന്ത്രിയുമായി സംഘടനാ പ്രതിനിധികൾ ചർച്ച നടത്തിയിരുന്നു. ഇതിൽ തീരുമാനമാകാത്തതോടെയാണ് കടുത്ത നടപടിയുമായി മുന്നോട്ടു പോകാൻ തീരുമാനിച്ചത്. 2020 ജനുവരി 1 മുതൽ 2023 ഫെബ്രുവരി 28 വരെ സർക്കാർ ശമ്പള കുടിശികയിനത്തിൽ നൽകാനുള്ള 1785 കോടി രൂപ നൽകണം, 25% ശമ്പള വർധന നടപ്പിലാക്കണമെന്നും ഇവർ ആവശ്യപ്പെടുന്നു.
കഴിഞ്ഞ ജനുവരിയിൽ കർണാടക ആർടിസി ടിക്കറ്റ് നിരക്ക് വർധിപ്പിച്ചിരുന്നു. നിലവിൽ കോർപറേഷൻ സാമ്പത്തികമായി മെച്ചപ്പെട്ട നിലയിലാണെന്നും അതിനാൽ തങ്ങളുടെ ആവശ്യങ്ങൾ പരിഗണിക്കണമെന്നും ജീവനക്കാർ ആവശ്യപ്പെടുന്നു.
SUMMARY: Karnataka RTC staff to go on strike from August 5.
