ബെംഗളൂരു റെയിൽവേ ശൃംഖലയിലുടനീളം കവച് സംവിധാനം നടപ്പാക്കും

ബെംഗളൂരു: ബെംഗളൂരു റെയിൽവേ ശൃംഖലയിലുടനീളം ഓട്ടോമാറ്റിക് ട്രെയിൻ പ്രൊട്ടക്ഷൻ സിസ്റ്റമായ കവച് നടപ്പാക്കാനൊരുങ്ങി റെയിൽവേ. ലഖ്‌നൗ ആസ്ഥാനമായുള്ള റിസർച്ച് ഡിസൈൻ ആൻഡ് സ്റ്റാൻഡേർഡ്സ് ഓർഗനൈസേഷൻ ഓഫ് ഇന്ത്യൻ റെയിൽവേ വികസിപ്പിച്ചെടുത്ത കവച് സംവിധാനം ഓരോ ട്രെയിനിന്റെയും വേഗത സിഗ്നലിംഗ് സിസ്റ്റം നിശ്ചയിച്ചിട്ടുള്ള പരിധിക്കുള്ളിലാണെന്ന് ഉറപ്പാക്കും.

ട്രെയിൻ നിശ്ചിത വേഗത നടന്നാൽ സിസ്റ്റം അടിയന്തര സിഗ്നൽ നൽകി ട്രെയിൻ നിർത്തുകയും അപകടങ്ങൾ ഒഴിവാക്കുകയും ചെയ്യുമെന്ന് ഡിവിഷണൽ റെയിൽവേ മാനേജർ അമിതേഷ് കുമാർ സിൻഹ പറഞ്ഞു. കവച് ബെംഗളൂരു ഡിവിഷന്റെ 1,144 കിലോമീറ്റർ വിസ്തൃതിയിൽ രണ്ട് ഘട്ടങ്ങളായി നടപ്പിലാക്കുമെന്ന് അഡീഷണൽ ഡിവിഷണൽ റെയിൽവേ മാനേജർ (എഡിആർഎം) അശുതോഷ് മാത്തൂർ പറഞ്ഞു. ആദ്യ ഘട്ടത്തിൽ 329 കോടി രൂപയ്ക്ക് ആകെ 684 കിലോമീറ്റർ അനുവദിച്ചിട്ടുണ്ട്. ബൈയപ്പനഹള്ളി മുതൽ പെനുകൊണ്ട, കെഎസ്ആർ ബെംഗളൂരു സിറ്റി മുതൽ ജോലാർപേട്ടൈ, കെഎസ്ആർ ബെംഗളൂരു മുതൽ സമ്പിഗെ റോഡ്, കെഎസ്ആർ ബെംഗളൂരു മുതൽ യെലിയൂർ വരെയുള്ള നാല് സെക്ടറുകളിലാണ് പ്രവൃത്തികൾ നടക്കുക.

രണ്ടാം ഘട്ടത്തിൽ, ധർമ്മപുരി മുതൽ ഒമല്ലൂർ, പെനുകൊണ്ട മുതൽ ധർമ്മവാരം, ചിക്കബാനവാര മുതൽ ഹാസൻ, യെലഹങ്ക മുതൽ ബംഗാർപേട്ട് വരെ 239 കോടി രൂപ ചെലവിൽ 460 കിലോമീറ്റർ ശൃംഖല പൂർത്തിയാക്കും. കർണാടകയിലെ 1,672 കിലോമീറ്ററിൽ റെയിൽ ലൈനിൽ കവച് സ്ഥാപിക്കുന്നതിനുള്ള ടെൻഡർ നടപടികൾ ആരംഭിച്ചതായി റെയിൽവേ മന്ത്രി അശ്വിനി വൈഷ്ണവ് നേരത്തെ പറഞ്ഞിരുന്നു. സംസ്ഥാനത്തെ 132 സ്റ്റേഷനുകളിലായി 1,703 കിലോമീറ്റർ ദൂരത്തിനാണ് തുടക്കത്തിൽ അനുമതി നൽകിയിരുന്നതെന്ന് അദ്ദേഹം കൂട്ടിച്ചേർത്തു.

TAGS: RAILWAY | KAVACH
SUMMARY: Kavach system to be introduced in Bengaluru rail network